“International Tennis Integrity Agency” (Itia) ka pezulluar përkohësisht Nick Kyrgios në kuadër të programit antidoping të tenisit. Australiani ka qenë një nga kritikët më të ashpër të Jannik Sinner për çështjen e marrjes së një substance të ndaluar në mënyrë të pavullnetshme.
Kyrgios-it, 31 vjeç, i ishte marrë një kampion më 22 qershor 2026, gjatë një turneu Atp 250 në Spanjë. Më 17 korrik, një laborator i autorizuar nga Wada, ka zbuluar praninë e benzoilekgoninës, një metabolit i kokainës. Substanca është në listën e Wada-s si një nga substancat e ndaluara. Prandaj vjen dhe ky pezullim i përkohshëm, që ka nisur më 4 gusht 2026. Kyrgios ka të drejtën të bëjë rekurs, por për momentin nuk rezulton kështu, pasi ai ka pranuar se ka bërë një gabim fatal.
Në Instagram tenisti Australian ka shkruar: “Doja që ta dëgjonit jua para meje. Së fundi kam dështuar në një test antidoping në Majorka, duke rezultuar pozitiv ndaj kokainës. Kam bërë një gabim të madh dhe marr përgjegjësitë. U kërkoj falje tifozëve, familjes, sponsorëve dhe gjithë njerëzve afër meje.
E di çfarë shembulli është ky dhe jam thellësisht i zhgënjyer me veten. Nuk kam justifikime, por dua të shpjegoj atë çfarë kam përjetuar. Dy vitet e fundit, mes dëmtimeve, kanë pasur një peshë të rëndë tek unë, fizikisht dhe mendërisht. Trupi im nuk ishte në gjendje të bënte atë që doja. Të pranoja se isha afër fundit të karrierës ishte shumë më e vështira nga sa e kisha imagjinuar”.
