Prokuroria Themelore në Pejë ka ngritur aktakuzë ndaj dy personave me inicialet V.H. dhe A.K., të cilët dyshohen për veprën penale “Mashtrimi”.
Sipas aktakuzës, i pandehuri V.H. dyshohet se është paraqitur rrejshëm si mjek në specializim në një spital në Turqi dhe i ka premtuar të dëmtuarit se do t’i mundësonte kryerjen e transplantimit të veshkës.
“Në këtë mënyrë, sipas aktakuzës, i pandehuri ka kërkuar dhe pranuar nga i dëmtuari mjete financiare, kinse për shpenzime spitalore dhe procedura lidhur me transplantimin”, thuhet në aktakuzë.
Më tej, në aktakuzë thuhet se i pandehuri ka përdorur në mënyrë të rreme të dhëna, dokumente dhe emra të mjekëve të një spitali në Turqi, me qëllim të krijimit të bindjes te i dëmtuari se procedura e transplantimit do të realizohej, duke i shkaktuar atij dëm material në shumën prej 134 mijë e 761 euro.
Ndërsa, i pandehuri tjetër, A.K., sipas aktakuzës, dyshohet se ka ndihmuar në kryerjen e kësaj vepre penale, duke e paraqitur V.H. si mjek në Turqi.
“Ndërkaq, i pandehuri A.K., sipas aktakuzës, dyshohet se ka ndihmuar në kryerjen e kësaj vepre penale, duke e njoftuar të dëmtuarin për të pandehurin V.H., duke e paraqitur atë rrejshëm si mjek në Turqi dhe duke i krijuar besim të dëmtuarit lidhur me kompetencat dhe mundësitë e tij për organizimin e transplantimit të veshkës”, shpjegohet tutje në aktakuzë.
Prokuroria bën me dije se në rast është përfshirë edhe një person tjetër, i cili, sipas aktakuzës, dyshohet se është paraqitur si dhurues i veshkës. Megjithatë, procedura penale ndaj tij është veçuar nga ajo ndaj dy të pandehurve të tjerë.
Prokuroria ka bërë me dije se i ka kërkuar gjykatës që të pandehurit t’i shpallë fajtorë dhe t’i dënojë sipas ligjit për veprat penale për të cilat akuzohen.
