Futbolli dhe muzika kanë ecur gjithmonë krah për krah, duke krijuar emocione që mbeten gjatë në kujtesën e tifozëve.
Çdo Kampionat Botëror i FIFA-s nuk sjell vetëm spektakël në fushën e lojës, por edhe këngë që shndërrohen në himne të një brezi të tërë.
Nga Gjermania 2006 deri te Botërori i vitit 2026, disa artistë kanë lënë gjurmë të pashlyeshme, por asnjë nuk është lidhur me Kupën e Botës aq fort sa Shakira.
Edhe pse himni zyrtar i Botërorit 2006 ishte “The Time of Our Lives”, interpretuar nga Toni Braxton dhe Il Divo, shumë tifozë e kujtojnë atë verë për performancën elektrizuese të Shakirës dhe Wyclef Jean me “Hips Don’t Lie (Bamboo)”.
Kënga u kthye në një fenomen global dhe për shumë njerëz përfaqësoi kolonën zanore të vërtetë të turneut. Pikërisht aty nisi edhe lidhja e veçantë mes Shakirës dhe Kupës së Botës.
Afrika e Jugut 2010: “Waka Waka” pushton planetin
Katër vite më vonë, Shakira realizoi atë që konsiderohet nga shumë tifozë si himni më i famshëm në historinë e Botërorëve.
“Waka Waka (This Time for Africa)”, në bashkëpunim me Freshlyground, solli ritme afrikane, energji pozitive dhe një mesazh bashkimi që kapërceu kufijtë e sportit.
Kënga u shndërrua në një sukses të jashtëzakonshëm ndërkombëtar dhe vazhdon të dëgjohet edhe sot si simbol i Botërorit 2010.
Po aq e dashur mbeti edhe “Wavin’ Flag” e K’naan, e cila u bë pjesë e fushatës globale të Coca-Cola-s dhe fitoi zemrat e miliona tifozëve.
Brazil 2014: Shakira sfidon himnin zyrtar
Botërori i Brazilit solli “We Are One (Ole Ola)” nga Pitbull, Jennifer Lopez dhe Claudia Leitte si këngën zyrtare të turneut.
Megjithatë, Shakira arriti sërish të dominojë vëmendjen me “La La La (Brazil 2014)”, një këngë që shumë tifozë e ndien më pranë shpirtit dhe atmosferës së futbollit brazilian.
Për të dytin Botëror radhazi, emri i saj ishte ndër më të përfolurit në skenën muzikore të turneut.
Rusi 2018: Momenti historik i Era Istrefit
Botërori i Rusisë solli një moment krenarie për shqiptarët. Kënga zyrtare “Live It Up” u interpretua nga Era Istrefi, Nicky Jam dhe Will Smith.
Performanca e artistes kosovare në skenën më të madhe të futbollit botëror u prit me entuziazëm të madh, duke e bërë atë një nga figurat më të komentuara të atij edicioni.
Katar 2022: Një Botëror me shumë himne
Për herë të parë, FIFA zgjodhi të mos fokusohej vetëm te një këngë kryesore.
Mes projekteve muzikore që shoqëruan turneun spikatën “Hayya Hayya (Better Together)” dhe “Dreamers”, e interpretuar nga Jung Kook i BTS në ceremoninë hapëse.
SHBA, Kanada dhe Meksikë 2026: Rikthimi i mbretëreshës
Për Botërorin 2026, që zhvillohet në tre vende organizatore, Shakira rikthehet edhe një herë në qendër të vëmendjes.
Artistja bashkëpunon me Burna Boy në këngën “Dai Dai”, duke sjellë një kombinim të ritmeve latine dhe afrikane që synon të bëhet kolona zanore e turneut.
Me këtë rikthim, Shakira forcon edhe më shumë statusin e saj si artistja që ka lënë gjurmën më të madhe në historinë muzikore të Kampionateve Botërore, duke shoqëruar breza të tërë tifozësh në emocionet e futbollit./TAR
