Policia e Kosovës ka bërë të ditur se kanë filluar me fazën testuese të pilot-projektit për kamerat e trupit.
Sipas njoftimit, Policia e Kosovës përmes projektit të pajisjes së zyrtarëve policorë me kamera të trupit ka për qëllim që të argumentojë aktivitetet policore që kryhen gjatë detyrës zyrtare në terren.
“Për t’u finalizuar si i tillë projekti, në bashkëpunim dhe koordinim me institucionet kompetente, fillimisht janë përgatitur dokumentacionet e nevojshme dhe Procedurat Standarde të Operimit, për të arritur tani deri në fazën testuese të përdorimit të kamerave të trupit në terren”, thuhet në njoftimin e Policë së Kosovës.
PK thotë se me qëllim të informimit, ka filluar faza testuese e përdorimit të kamerave të trupit nga Njësia për Kontroll të Autostradave, për të vazhduar më pas edhe me njësitë tjera policore.
“Policia e Kosovës pas fazës testuese, përmes njoftimit zyrtar, apo konferencës zyrtare do të njoftojë opinionin dhe qytetarët, për fillimin zyrtar të përdorimit të kamerave të trupit, përfshirë edhe dhënien e informacioneve më të detajuara të këtij projekti”, thuhet mes tjerash në njoftim./teve1.info/
