Koalicioni i Organizatave të Shoqërisë Civile, i përbërë nga Instituti i Kosovës për Drejtësi (IKD), Lëvizja FOL dhe Iniciativa për Progres (INPO), me moton “Bashkë Kundër Korrupsionit”, do të organizojë Javën Kundër Korrupsionit nga 8 deri më 12 dhjetor 2025.
Siç bëhet e ditur në komunikatën për media, gjatë kësaj jave, Koalicioni do të zhvillojë një sërë aktivitetesh me qëllim sensibilizimin e opinionit publik mbi korrupsionin dhe forcimin e transparencës, integritetit dhe llogaridhënies në institucionet publike.
Aktivitetet përfshijnë konferenca për media, tryeza diskutimi, publikim të raporteve analitike, podkaste, aktivitete publike, si dhe nisma kreative në rrjetet sociale, duke trajtuar temat më kritike në fushat e korrupsionit, krimit të organizuar, sundimit të ligjit, qeverisjes së mirë dhe funksionimit të institucioneve të drejtësisë në Kosovë.
“Gjatë “Javës Kundër Korrupsionit 2025”, do të publikohen një sërë raporte në këto fusha, përfshirë: “Performanca e drejtësisë në ndjekjen dhe gjykimin e korrupsionit” (IKD), “Anulimet – forma më e heshtur e keqpërdorimit në prokurim publik” (INPO), “Llogaridhënia përballë skandaleve qeveritare” (IKD), “Mbrojtja e sinjalizuesve në Kosovë, mes ligjit dhe realitetit” (FOL), “Korrupsioni si shkelje e të drejtave të njeriut” (IKD) , “Deklarimi i pasurisë: Gabimi gjyqësor që hoqi të gjithë përgjegjësinë shkelësve të ligjit” (IKD) dhe “Pavarësia dhe efikasiteti i OSHP-së: ndërmjet zbatimit të ligjit dhe luftës kundër korrupsionit” (INPO)”, thuhet në komunikatë.
Si pjesë e aktiviteteve sensibilizuese, koalicioni do të realizojë promo-video të përditshme, aktivitete kundër krimit të organizuar dhe një grevë simbolike një-ditore me moton “Greva kundër korrupsionit”, si shenjë proteste ndaj mungesës së përgjegjshmërisë institucionale.
“Të gjitha aktivitetet do të mbahen në Prishtinë, në hapësirat e IKD-së, në Hotel Prishtina si dhe produktet mediatike do të shfaqen në platformat online e organizatave të Koalicionit”, theksohet në fund të komunikatës./teve1.info/
