Ministria e Kulturës dhe Turizmit ka njoftuar se është nënshkruar një marrëveshje bashkëpunimi ndërmjet Bibliotekës Kombëtare të Kosovës “Pjetër Bogdani” dhe Bibliotekës Nazionale Marciana në Venecia.
Marrëveshja është realizuar në kuadër të projektit bilateral Kosovë–Shqipëri “Modalitete Kërkimore në Arkivat e Venecias”, duke shënuar bashkëpunimin e parë zyrtar ndërmjet dy institucioneve.
Gjatë vizitës zyrtare në Itali, delegacioni nga Kosova ka marrë pjesë në një trajnim intensiv me ekspertë të bibliotekave dhe arkivave të Marcianas.
Trajnimi është fokusuar në shkëmbimin e përvojave profesionale dhe avancimin e bashkëpunimit në fushën e bibliotekarisë dhe trashëgimisë kulturore.
Sipas njoftimit, ky bashkëpunim pritet të hapë rrugë për projekte të përbashkëta dhe për promovimin e mëtejmë të trashëgimisë kulturore shqiptare në nivel ndërkombëtar./teve1.info/
