Palestra “Bill Clinton” në Ferizaj do të mirëpresë në fundjavë tetë skuadra që synojnë Kupën e Kosovës në hendboll.
Në “qytetin e hendbollit”, ashtu si njihet Ferizaj, do të luhet turneu final i Kupës së Kosovës në këtë sport. Do të zhvillohen gjysmëfinalet dhe finalet në të dy konkurrencat.
Ndeshjet gjysmëfinale janë të shtunën, ndërsa finalet janë të dielën.
Në gjysmëfinale fillimisht luajnë hendbollistet. Prej orës 14:00 takohen Istogu e Prishtina, derisa në gjysmëfinalen e dytë, prej orës 16:00, luajnë Vushtrria dhe Ferizaj.
Istogu ditë më parë fitoi titullin e kampionit dhe llogaritet favorit. Në kampionat, istogaset nuk pësuan asnjë humbje. Njëjtë vazhduan edhe në plejof, ku fillimisht kaluan Vushtrrinë e më pas Ferizajn në finale. Istogu ka në përbërje shumë lojtare të huaja, nga Brazili e Mali i Zi, dhe llogarit në përvojën e tyre. Prej tri brazilianeve që i ka në përbërje pret shumë edhe Ferizaj, që e mori përsipër organizimin e turneut final të Kupës me synim për ta festuar trofeun.
Te hendbollistët, favorite e madhe është Besa Famgas. Besa pa asnjë telashe e ka fituar titullin e kampionit, duke ngadhënjyer në të gjitha ndeshjet. Fillimisht skuadra pejane sfidohet nga Prishtina në gjysmëfinale, të shtunën prej orës 20:00. Në gjysmëfinalen e parë të hendbollistëve takohen Deçani e Kastrioti. Kjo ndeshje luhet nga ora 18:00.
Deçani ka arritur sukses të madh me kalimin në gjysmëfinale, por do të mbështetet edhe në përkrahjen e shikuesve në tentim për të bërë hapin tjetër. Përkrahjen e shikuesve e pret edhe Kastrioti, që luan në palestrën e tij. Skuadra ferizajase është riorganizuar këtë vit dhe synon kalimin në finale. Të dy këto skuadra kanë pasur shumë më tepër kohë në dispozicion për t’u përgatitur për ndeshjet e Kupës.
Por ndeshja Prishtina – Besa Famgas llogaritet finale para finales.
Të dielën finalja e hendbollistëve zhvillohet prej orës 17:30, ndërsa ajo e hendbollisteve prej orës 20:00.
