Policia e Kosovës ka bërë thirrje për ndihmë nga qytetarët për identifikimin e një personi të moshuar, rreth 70 vjeç, i cili u gjet pa shenja jete në rrugën “Edit Durham” në Prizren.
Sipas njoftimit të policisë, më 26 mars 2026, rreth orës 11:36, stacioni policor mori informacion për rastin nga ekipi i Urgjencës.
“Patrulla policore, së bashku me ekipin kujdestar të hetuesisë dhe ekipin e krim-teknikës, kanë dalë në vendin e ngjarjes, i cili gjendet tek banesat e ish TMK-së. Sipas informatave fillestare viktima është mashkull i moshuar, rreth 70 vjeçar, ende i paidentifikuar. Ekipi i Urgjencës ka konstatuar se viktima ka ndërruar jetë të paktën 2–3 orë para mbërritjes së mjekëve. Nuk janë vërejtur shenja të një vdekjeje të dhunshme. Në vendin e ngjarjes ka dalë edhe ekipi i hetimeve rajonale, të cilët pas konsultimit me prokurorin e Shtetit kanë iniciuar rastin si “hetim i vdekjes””, thuhet në njoftim.
Trupi i pajetë është dërguar në Institutin e Mjekësisë Ligjore në Prishtinë për ekzaminime të mëtejshme.
Policia apelon që çdo qytetar që ka informacion për identitetin e viktimës, të kontaktojë stacionin më të afërt policor ose të telefonojë në numrin 192.
