Zyrtarët policor, u vendosën para Ambasadës së Shqipërisë në Kosovë.
Kjo meqë për të enjten, këtu u paralajmërua një protestë paqësore.
E në ora 12:00, protestuesit filluan të mblidhen.
Janë këta pjesëtarët e Kolektivit për Mendim dhe Veprim Feminist, të cilët u mblodhën për të protestuar kundër privatizimit të pronave të mbrojtura me ligj në Shqipëri.
Për këtë, ishin bërë gati edhe pankartat.
Nga Prishtina, patën edhe kërkesa.
Aktivistja e kësaj organizate, Liridona Sijarina tha se bëhet fjalë për dy nga ishujt me të njohur të Shqipërisë.
“Kjo marrëveshje e Ramës synon me zaptu tokën shqiptare e me ja u dhënë pasanikëve, pra me shndërru në një vend të tërë në resort e në lavë për milionerë të huaj e vendorë. Zvërneci dhe Sazani shpesh herë portretizoheshin në mediat ndërkombëtare si diamantet natyrore të Shqipërisë. Edhe si të tilla nuk është e çuditshme për ne, që nën këtë qeverisje grabitqare, herë do kur, apetitet e kapitalit global, të përfaqësuar me këtë rast prej Jared Kushner dhe Ivanka Trump, me zbarku në këto toka edhe me fillu shpronësimin e tyre prej publikut në private”, u shpreh Liridona Sijarina-aktiviste.
“Pse jemi mbledh sot është veç me kumtu solidaritetin tonë me shokët edhe shoqet tona në Shqipëri që i bashkohemi në luftën e egër kundër zhvillimit të egër kapitalist, edhe qëndrojmë prapa tyre”, u shpreh Diana Morina.
E dikush tjetër, tha se protestat në rastet e tilla, janë obligim.
“Ne shqiptarët e Kosovës, gjithmonë i kanë pri çdo lëvizje, kështu që edhe vëllezërit në Shqipëri kanë besim të madh ne edhe presim shtetin tonë ne e kemi për obligim”, tha Shpend Venhari.
Ndryshe, ngjarjet dhe pamjet e ditëve të fundit nga Zvërneci, ku banorët lokal protestuan kundër investimeve të huaja, kanë nxitur reagime të mëdha në vend.
Për këtë, protesta të mërkurën u mbajtën edhe në Tiranë.
