Kryesia e Bashkësisë Islame të Kosovës dhe Rijaseti i Bashkësisë Islame të Bosnjës organizuan ekspozitë fotografike në Prishtinë: “Bota kujton Srebrenicën”. Në këtë ekspozitë përmes fotografive autentike u ilustrua historia e saj dhimbjet, vuajtjet e viktimave dhe të mbijetuarve të masakrës
Përfaqësues institucional dhe fetarë u bënë bashkë të enjten në Prishtinë.
Kjo meqë dy bashkësitë islame, ajo e Kosovës dhe Bosnjës e Hercegovinës organizuan një ekspozitë.
Në ambientet e një hoteli në Prishtinë, këta prezantuan fotografi nga gjenocidi në Srebrenicë.
Përjetimet e asaj që ndodhi rreth tri dekada më parë, para të pranishmëve në Prishtinë i solli dëshmitari dhe imami, Mevludin Hmjiq.
Andaj organizimin e sotëm e vlerësuan lart përfaqësues të rijasetit të Bosnje e Hercegovinës.
“Organizimi i sotëm na tregon se kujtimi për Srebrenicën duhet të mbetet i gjallë, jo vetëm për familjet e viktimave, por edhe për të gjithë ne. Ngjarjet e tilla na mësojnë shumë, por mbi të gjitha përgjegjësinë dhe respektimin e njëri-tjetrit pa asnjë dallim”, tha Azra Efndic Eminovi – Përfaqësuese e Rijasetit të Bosnjës dhe Hercegovinës.
E Myftiu i Kosovës, Naim Tërnava theksoi se pas një krimi të tillë qëndrojnë pushtetet me qëllim shfarosjen e etnive të shtypura.
“Në Bosnjë ishte qëllimi i spastrimit etnik e atij fetar të boshnjakeve siç ishte edhe në Kosovë në vitet 98-99 me shumë masakra si në Reçak, Abri, Mejë e shumë masakra tjera”, u shpreh Tërnava.
Se e ndjejnë dhimbjen e thellë si boshnjakë në gjykimin e gjenocidit e tha zëvendës-kryeministrja Emilja Rexhepi.
Ekspozita përmbante 11 segmente të gjenocidit ku përshkruajnë fazat e gjenocidit nga ngjarjet paraprake tek ekzekutimi i krimeve dhe deri tek fshehja e tyre.
Me këtë ekspozitë synohet të rritet ndërgjegjësimi për gjenocidin në Srebrenicë dhe të nderohen viktimat e këtij gjenocidi.
Më shumë se 8 mijë myslimanë nga Bosnja u vranë brenda pak ditëve nga forcat e armatosura serbe në korrik të vitit 1995.
