Në Gjykatën Speciale në Hagë ka nisur sot seanca gjyqësore në të cilën pritet të shpallet vendimi lidhur me mocionin e dorëzuar nga ekipet mbrojtëse të ish-krerëve të Ushtrisë Çlirimtare të Kosovës (UÇK), për të rrëzuar pjesë të caktuara të aktakuzës për krime të pretenduara të luftës.
Të pranishëm në seancë janë Hashim Thaçi, Kadri Veseli, Rexhep Selimi dhe Jakup Krasniqi ku janë paraqitur fizikisht në këtë seancë.
Mbrojtja kishte afat deri më 12 qershor për të dorëzuar mocionin për rrëzimin e akuzave.
Zyra e Prokurorit të Specializuar pati afat deri më 7 korrik për t’iu përgjigjur.
Vendimi që pritet të publikohet sot do të ketë ndikim të drejtpërdrejtë në vazhdimin e procesit gjyqësor.
Thaçi, Veseli, Selimi dhe Krasniqi ndodhen në paraburgim në Hagë që nga nëntori i vitit 2020. Ata janë të akuzuar për krime lufte dhe krime kundër njerëzimit. Procesi ndaj tyre është cilësuar i stërzgjatur dhe është kritikuar nga shumë vëzhgues dhe përfaqësues të ndryshëm vendorë e ndërkombëtarë.
