Dita ndërkombëtare e Gjuhës Amtare i mblodhi të enjten gjuhëtarë nga Kosova, Shqipëria e Maqedonia e Veriut.
Në një tryezë shkencore, studiuesit diskutuan për problemet e drejtshkrimit të gjuhës shqipe në përdorimin publik.
“Në këtë kohë moderne, shqipja standarde është më se e domosdoshme dhe më se e nevojshme për të pasur një komunikim të qëndrueshëm edhe për ta ruajtur integritetin e plotë gjuhësor po edhe kombëtar”, tha profesor dr. Abdurrahim Maxhuni.
E në hapje të kësaj tryeze, një fjalë përshëndetëse e dha u.d i Drejtorit të Institutit Albanologjik në Prishtinë, prof. Naim Berisha.
“Kjo tryezë shërben edhe si një platformë për të forcuar lidhjet tona, për të shkëmbyer ide dhe për të mbajtur gjallë bashkëpunimin mes qendrave të ndryshme albanologjike”, u shpreh profesor dr. Naim Berisha.
Ndërsa dekani i fakultetit të shkencave humane të universitetit “Nënë Tereza” nga Shkupi, prof. Mustafa Ibrahimi bëri një thirrje ndaj shqiptarëve të Kosovës, Shqipërisë e Maqedonisë së Veriut.
“Në librin e kuq të gjuhëve të rrezikuara është edhe gjuha arbëreshe. Andaj mendimi është se tre shtetet duhet të hartojnë programe të veçanta për t’i shpëtuar nga zhdukja”, tha profesor dr Mustafa Ibrahimi.
E pas fjalëve përshëndetëse, nisi tryeza shkencore për gjuhën shqipe.
Aty u diskutua edhe për sistemin rasor të shqipes, gabimet gjuhësore në media, stili gjuhësor i mësimdhënësve, si dhe mohimit të përdorimit të shqipes si gjuhë zyrtare në Maqedoninë e Veriut.
Tryeza shkencore përfundoi me nënshkrimin e një marrëveshjeje bashkëpunimi mes Institutit Albanologjik edhe Universitetit “Nënë Tereza” në Shkup.
