Ditën e sotme në rrjet qarkulluan disa pamje që tregonin dëmtimin e pllakës së një varri që dukej të ishte i ish-aktivistit të Lëvizjes Vetëvendosje të Kosovës, Astrit Deharit.
Vetëm pak orë pas, ka reaguar edhe partia në fjalë duke e konfirmuar një gjë të tillë.
Përmes një njoftimi zyrtar, ata shprehen se Policia e Kosovës është e njoftuar për rastin, me ç’rast e ka falënderuar për reagimin e shpejtë, përcjell Sinjali.
“Me keqardhje kemi marrë lajmin se është dëmtuar shtylla dhe pllaka e flamurit kombëtar pranë varrit të aktivistit tonë, Astrit Dehari”, thuhet në njoftim.
Tutje VV-ja bën të ditur se janë në pritje të hetimeve nga policia.
“Falënderojmë të gjitha njësitë e Policisë së Kosovës për reagimin e shpejtë, ndërkaq si Lëvizje VETËVENDOSJE! jemi në pritje të hetimeve që njësitë e specializuara të Policisë së Kosovës po zhvillojnë në drejtim të zbardhjes së shkaqeve apo shkaktarëve të këtij dëmtimi”, deklaroi LVV-ja.
Dehari vdiq në nëntor të 2016-tës, në Qendrën e Paraburgimit në Prizren, dhe rrethanat mbi vdekjen e tij ende vazhdojnë të mbeten të paqarta.
