Dënimet po shihen si zgjidhje.
Por vetëdijesimi, si problem.
Mbeturinat në hapësirat publike vazhdojnë të mbeten shqetësim i përditshëm, pavarësisht ligjeve që i ndalojnë dhe disa komunave që paralajmërojnë masa ndëshkuese.
Por, a mjaftojnë dënimet për të ndryshuar sjelljen ndaj ambientit, sipas qytetarëve?
ISMET SALIHU – QYTETAR (00:27 – 00:39)(00:44 – 00:47)
“Jashtëzakonisht shumë ka mbeturina si në kryeqytet, periferi, lumenj e kjo është tregues i ulët i kulturës së njerëzimit prandaj edhe duhet të dënohet. Dënimi e ka për qëllim edhe me dënu, por edhe me eduku”, thotë qytetari Ismet Salihu.
E dikush tjetër thotë që Komuna është ajo që duhet ta zbatojë ligjin.
“Së pari duhet të ketë rregull brenda komunës, të respektohet ligji nga ana e komunës, kur respektohet ligji nga ana e komunës për mbledhjen e mbeturinave edhe për gjobitjen e personave që hedhin gjithandej”, thotë qytetari Agim Krasniqi.
Ndërsa një qytetar tjetër mendon ndryshe.
“Nuk mendoj që është përgjegjësi vetëm e komunës, është e krejt qytetarëve që duan të jetojnë dhe të kënaqen në këtë ambient dhe fatkeqësisht jo të gjithë janë të tillë. Dënimet janë formë që me i vetëdijesua ata që nuk e kuptojnë që ky është ambient i përbashkët”, potencoi qytetari tjetër Kreshnik Basha.
Sipas profesorit të mjedisit, Sami Makolli, dënimi është ai vendim që do ta kishte përmirësuar gjendjen.
“Ne e përkrahim çdo iniciativë, çdo përpjekje për me mujt me i largu mbeturinat, mirëpo duhet të theksojmë që çështja e mbeturinave nuk është që është mungesë e ligjit por është mungesë e zbatueshmërisë së ligjit në një shoqëri ku duket që vetëdijesimi është ende larg. Dhe kjo vetëdije nuk krijohet vetëm me thirrje për të mos i hedh mbeturinat por vetëm me gjoba administrative”.
Komuna e Obiliqit është një nga komunat që së fundmi ka vendosur të ndërmarrë masa më të rrepta ndaj ndotjes së hapësirave publike, duke paralajmëruar gjoba prej një mijë euro për qytetarët dhe bizneset që nuk respektojnë rregullat për menaxhimin e mbeturinave.
Kronikë e realizuar nga gazetarja Jona Kelmendi.
