Liridon Kastrati, 32-vjeçar nga Kosova, është shpallur fajtor të martën për tentim vrasjeje nga Gjykata e Lartë në Paisley të Skocisë, raportojnë mediat atje.
Vendimi për dënimin e tij do të jepet më 19 dhjetor.
Fillimisht, Kastrati përballej me akuza për tentim vrasjeje ndaj katër policëve, megjithatë ai u shpall fajtor vetëm për tentim vrasjeje ndaj njërit prej tyre.
Ngjarja ka ndodhur më 6 maj 2024 në Glasgow Road, kur Kastrati kishte ndjekur një polic me një sharrë elektrike në mes të ditës.
Pamjet e publikuara nga rasti e tregojnë atë duke kaluar pranë një furgoni policie dhe duke vrapuar drejt një polici, ndërsa dhjetëra efektivë tentonin ta ndalonin.
Polici Gary Cowan dëshmoi në gjykatë se airbagu i veturës policore ishte aktivizuar gjatë incidentit dhe se ai ishte afruar drejt Kastratit për ta arrestuar. Sipas tij, kur ishte rreth 10 metra larg, Kastrati ishte kthyer drejt automjetit të tij, kishte marrë sharrën elektrike dhe kishte nisur ta ndiqte.
Gjykatësi paralajmëroi se pritet një dënim i rëndë për shkak të natyrës serioze të veprës.
Avokati mbrojtës i Kastratit, John Scullion, pranoi para jurisë se klienti i tij ka përdorur sharrën elektrike dhe ka lënduar policin Cowan. “Z. Kastrati pranon se mori sharrën nga vetura, shau dhe lëndoi policin. Ai e drejtoi atë edhe drejt policëve të tjerë në një incident të frikshëm. Për këtë duhet shpallur fajtor,” tha ai.
Kastrati u dënua për një akuzë të ndryshuar, ndërsa gjykatësi Gallacher theksoi se vepra për të cilën u shpall fajtor është jashtëzakonisht serioze.
View this post on Instagram
