Të tre, u arrestuan ditën e sulmit terrorist në Banjskë të Zveçanit.
Blagoje Spasojeviq, Vladimir Toliq dhe Dushan Maksimoviq që nga atëherë janë në duart e drejtësisë.
Si të akuzuar për sulm terrorist, ata po përballen me këto akuza që nga muaji prill i këtij viti, kur ka nisur procesi gjyqësor.
Deri më tani janë dëgjuar disa dëshmitar.
Megjithatë, avokati i njërit prej policëve të dëmtuar gjatë sulmit, ngritë shqetësime për disa prej dëshmitarëve në këtë proces.
“Është pak shqetësuese gjatë dëgjimit të dëshmitarëve, pra dëshmitarët kryesisht ata të nacionalitetit serbë të cilët kanë ndërmarrë ndoshta edhe veprime të ndaluara apo të kundërligjshme në lidhje me grupin terrorist, po vijnë në gjykim dhe po dëshmojnë rrejshëm. Për çka ne jemi detyruar të parashtrojmë kallëzim penal për deklarim të rremë ndaj disa dëshmitarëve”, ka thënë avokati, Naim Rudari.
Për 43 të akuzuarit e tjerë, që synonin aneksimin e veriut të vendit, Gjykata Themelore në Prishtinë ka lëshuar fletërreshtim ndërkombëtar.
Disa prej tyre, janë parë së fundi bashkë me kryeterroristin Milan Radoiçiq, duke ruajtur presidentin serb, Aleksandër Vuçiq, në tubimet e tij politike.
Për gjithë këta persona, kërkohet që gjyqësori në Kosovë, të fillojë t’i gjykojë në mungesë.
“Ka mundësi që të gjykohen në mungesë gjithë këta persona. Është procedura më e rëndë, mirëpo Kodi i Procedurës Penale e ka rregulluar mjaftueshëm dhe ka krijuar bazë ligjore që të gjykohen në mungesë të gjithë ata persona që janë të pakapshëm për insituticonet e drejtësisë”, shprehet avokati, Skender Musa.
Në ndërkohë, gjyqi ndaj Blagoje Spasojeviq, Vladimir Toliq dhe Dushan Maksimoviq, do të vazhdojë në muajin tetor.
