Udhëheqësit e Odave të profesionistëve Shëndetësor së bashku me ministrin Arben Vitia, i kanë përkujtuar profesionistët shëndetësor ndër vite, duke i nderuar për kontributin e tyre në periudha të ndryshme të punës, raporton teve1.info
Sipas një publikimi në Facebook, nga Oda e Mjekëve të Kosovës, profesionistët shëndetësor u nderuan për kontributin e tyre gjatë helmimeve në demonstratat e viteve ‘50, ‘51, ‘81 e ’89, luftën e UÇK-së si dhe gjatë pandemisë Covid19.
“Kryetari i Odës së Mjekëve të Kosovës, Dr. Pleurat Sejdiu tha se i përulemi përjetësisht mjekëve dhe të gjithë Profesionistëve Shëndetësor për kontributin e dhënë për dekada. Ai gjithashtu tha se duhet të jemi të bashkuar në mënyrë që të arrijmë rezultate pozitive në çdo aspekt.
Ministri i Shëndetësisë, Dr. Arben Vitia u shpreh se është falënderues ndaj përkushtimit dhe angazhimit të Profesionistëve Shëndetësor ndër vite dhe falënderoi Kryetarët e OPSH-ve për këtë iniciativë të ndërmarrë, realizimin e monumentit Obelisku në nderim të Profesionistëve Shëndetësor.
Kryetarët e Odave të Profesionistëve Shëndetësorë gjithashtu shprehën mirënjohje dhe falënderime”, thuhet në njoftimin e Odës së Mjekëve.
