Policia e Kosovës ka kapur një 18-vjeçar në Shtërpcë me 10 cigare të mbushura me marihuanë, pas një kontrolli të realizuar në automjetin ku ai ndodhej.
Sipas njoftimit të Policisë, të premten rreth orës 21:30, në fshatin Drajkovc, një automjet i tipit Audi Q8 me targa vendore nuk i është ndalur patrullës policore për kontroll dhe ka vazhduar lëvizjen. Pas asistimit nga një patrullë tjetër, automjeti është ndalur në qendrën e Shtërpcës.
Gjatë kontrollit të automjetit dhe personave që ndodheshin brenda, siç thotë njoftimi, në bagazh janë gjetur dhe sekuestruar 10 cigare të mbushura me substancë narkotike të llojit marihuanë, me peshë totale 10.52 gramë. Në automjet ndodheshin gjithsej katër persona, ndërsa 18-vjeçari ka pranuar se droga i përkiste atij.
Lidhur me rastin është njoftuar Njësia Anti-Drogë si dhe prokurori i shtetit, i cili ka autorizuar ndërmarrjen e veprimeve hetimore, përfshirë intervistimin e të dyshuarit në prani të avokatit, sipas procedurës.
Pas përfundimit të procedurave, i dyshuari është liruar në procedurë të rregullt, ndërsa tre personat e tjerë janë intervistuar në cilësinë e dëshmitarëve./teve1.info/
