Policia e Kosovës ka njoftuar se të mërkurën në bashkëpunim me KFOR-in, në fshatin Gnjezdan të Leposaviqit janë ndaluar gjashtë automjete transportuese dhe një veturë me targa të Serbisë, të ngarkuara me mallra të ndryshme.
Në njoftim thuhet se automjetet transportonin produkte ushqimore, mjete teknike të punës, mobilie dhe mallra të tjera, me një vlerë të përgjithshme që arrin mbi 26 mijë euro.
Të dyshuarit janë gjashtë shtetas të Serbisë dhe një shtetas i Republikës së Kosovës.
“Me datën 21.05.2025, rreth orës 18:10, gjatë një aktiviteti të përbashkët të njësive policore të Policisë së Kosovës dhe KFOR-it, në rrugën ilegale në fshatin Gnjezdan, komuna e Leposaviqit, janë ndaluar gjashtë kombi transportues të mallrave dhe një veturë me targa të Serbisë të ngarkuara me mallra të ndryshme, me vozitës gjashtë nga ta shtetas të Serbisë dhe një vozitës shtetas i Republikës së Kosovës. Automjetet dhe mallrat e ngarkuara (produkte ushqimore, mjete teknike të punës, mobile etj.) vlera e përgjithshme e të cilave vlerësohet se është mbi 26000 (njëzet e gjashtë mijë) euro, janë trajtuar nga njësitë kompetente kufitare të Drejtorisë Rajonale Kufitare-Veri nën dyshimin për mallra të kontrabanduara apo tregti të paligjshme, po ashtu për procedurat e mëtejme, rasti do të trajtohet edhe nga ana e Doganës së Kosovës dhe Administrata Tatimore e Kosovës”, thuhet në njoftimin e Policisë./teve1.info/
