Dy zyrtarë të lartë të Qendrës për Punë Sociale në Prishtinë janë ndaluar sot me urdhër të prokurorit të Shtetit, nën dyshimin se kanë keqpërdorur detyrën zyrtare.
Sipas njoftimit, të dyshuarit V.M dhe V.M., dyshohet se kishin punësuar rreth 10 persona në QPS-së në mënyrë të kundërligjshme, përcjell teve1.info
Po ashtu, kishin caktuar si menaxhere për trajtimin e një rasti të dhunës seksuale, një grua e cila nuk kishte plotësuar kushtet për ta trajtuar një rast të tillë.
“Prokuroria Themelore në Prishtinë, njofton opinionin publik se Departamenti për Krime të Rënda, konkretisht Njësiti për Krime Ekonomike dhe Korrupsion, pas ndërmarrjes së veprimeve hetimore në koordinim të plotë më Policinë e Kosovës – Departamenti për Hetimin e Krimeve Ekonomike dhe Korrupsion në Prishtinë, ka lëshuar aktvendim mbi ndalimin e dy personave, V.M. dhe V.M., nën dyshimin se të njëjtit në cilësinë e zyrtarëve të lartë të QPS-së në Prishtinë kanë kryer veprën penale ’Keqpërdorimi i pozitës apo autoritetit zyrta’, sipas nenin 414 të KPRK-së, ngase të njëjtit dyshohen se gjatë ushtrimit të detyrave të tyre zyrtare, në mënyrë të kundërligjshme, kanë punësuar rreth 10 persona në këtë institucion, si dhe në mënyrë të kundërligjshme e kanë caktuar si menaxher për trajtimin e një rasti të dhunës seksuale, njërën nga të punësuarat përkundër faktit se e angazhuara nuk i kishte plotësuar kushtet ligjore për të trajtuar një rast të tillë dhe të ndjeshëm”, thuhet në njoftim. /Teve1.info/
