Prokuroria Themelore në Prishtinë ka ndaluar për 48 orë dy persona me inicialet A.D. dhe L.D., nën dyshimin për kryerjen e veprave penale “Lëndimi i rëndë trupor”, “Mbajtja në pronësi, kontroll ose posedim të paautorizuar të armëve” dhe “Kanosja”.
Sipas njoftimit të Prokurorisë, ndalimi është bërë pas paraqitjes së të dyshuarve në Policinë e Kosovës dhe me aktvendim të Prokurorit të Shtetit, pas dyshimeve të bazuara se kanë kryer veprat penale të lartpërmendura.
Nga veprimet hetimore të ndërmarra deri më tani, Prokuroria ka siguruar prova që mbështesin dyshimin e bazuar se rasti lidhet me një ngjarje të ndodhur më 23 mars 2026 në Prishtinë, ku i dëmtuar ishte një zyrtar i Inspektoratit Policor të Kosovës (IPK).
Prokuroria ka bërë të ditur se hetimet kanë vazhduar me intensitet, me qëllim të sqarimit të plotë të rrethanave të rastit dhe sigurimit të provave të nevojshme.
Prokurori i Shtetit, në bashkëpunim me Policinë e Kosovës, po ndërmerr veprimet e mëtejshme hetimore dhe procedurale në përputhje me kompetencat ligjore, me synim zbardhjen e plotë të ngjarjes dhe ndjekjen penale të personave përgjegjës.
“Prokuroria Themelore në Prishtinë në bashkëpunim dhe koordinim të ngushtë me Policinë e Kosovës, mbeten të përkushtuara në luftimin e sundimit të ligjit, ndjekjen penale të të gjithë personave që bien ndesh me ligjin”, theksohet në fund të njoftimit./teve1.info/
