10 gjyqtarë dhe 5 prokurorë brenda një viti morën masa disiplinore nga Këshillat përkatës. Këto vendime që variojnë nga zvogëlimi i lartësisë së pagës e deri tek degradimi i përhershëm i pozitës, vlerësohet se nuk janë veprime të mjaftueshme.
Në vazhdimësi ka ankesa për akterë të sistemit të drejtësisë.
Vetëm ndaj gjyqtarëve për një vit, janë pranuar 123 njoftime për pranim të ankesave disiplinore të paraqitura nga persona fizik dhe juridik.
Për 10 prej tyre sipas KGJK-së, janë marrë vendime.
“1 vendim: Zvogëlim i përkohshëm i pagës në lartësi prej 40% për 4 muaj; 4 vendime: Lirim nga përgjegjësia disiplinore; 2 vendime: Propozim për shkarkim; 2 vendime: Vërejtje publike me shkrim; 1 vendim: Transferim i përhershëm nga Departamenti i Përgjithshëm, Divizioni Penal i Gjykatës Themelore në Departamentin e Përgjithshëm, Divizioni për Kundërvajtje i të njëjtës gjykatë”, kanë thënë nga KGJK.
Më pak në numër ishin ankesat ndaj prokurorëve të shtetit.
Përgjatë vitit 2023, KPK-ja, pranoi 8 kërkesa për inicim të procedurës disiplinore.
“Autoritetet kompetente që ka ushtruar kërkesë për inicim të procedurës disiplinore janë nga Prokuroria Themelore në Prishtinë, me 6 kërkesa, si dhe nga Prokuroria Themelore në Prizren, me 2 kërkesa. Me vendim të Këshillit Prokurorial janë shqiptuar 5 masa disiplinore për 6 raste disiplinore. Një rast nuk është gjetur përgjegjës për shkelje disiplinore por rasti është dërguar në performancë dhe një rast i vitit 2023 është në shqyrtim në Këshill”, kanë deklaruar nga KPK.
E gjithë këto ankesa dhe vendime për procedura disiplinore, po konsiderohen si shpërfaqje e gjendjes së sistemit të drejtësisë, për çka kërkohet më shumë veprime nga ana e Këshillit Gjyqësor dhe Këshillit Prokurorial.
“Këshillat duhet të jenë më aktiv në drejtim të adresimit të përgjegjësisë dhe adresimit të llogaridhënies për sistemin gjyqësor, përkatësisht atë prokuroria. Për faktin se jo rrallë herë kemi qoftë edhe shpërfaqje hapur të pikëpamjeve qoftë të gjyqtarëve, qoftë të prokurorëve, që denigrojnë ose degradojnë kategori të caktuara të njerëzve”, ka deklaruar avokati Ardian Bajraktari.
Masat disiplinore ndaj gjyqtarëve dhe prokurorëve, vijnë pas një periudhe pune nga ana e paneleve hetimore, që caktohen për secilin rast veç e veç.
