Prania ushtarake e Organizatës së Traktatit të Atlantikut Verior në Kosovë është e domosdoshme për ruajtjen e paqes dhe stabilitetit në tërë rajonin e Ballkanit Perëndimor.
Kështu thuhet në raportin vjetor të NATO-s, i cili pas publikimit u prezantua të enjten në Bruksel nga shefi i Aleancës, Jens Stoltenberg.
Në raport përmendet edhe sulmi terrorist në Banjskë i 24 shtatorit, ndërsa theksohet se KFOR-i ka luajtur një rol kyç për ta siguruar stabilitetin e Kosovës në atë kohë.
“Në vitin 2023, KFOR-i luajti rol kyç për të siguruar stabilitet në Kosovë pas rritjes së tensioneve në veri të Kosovës. Pas shpërthimit të dhunës në muajin maj dhe shtator, aleatët dislokuan rreth 1.000 forca rezervë për misionin, që paraqet rritjen më të madhe në një decenie. Kjo ia ka mundësuar KFOR-it ta trefishojë numrin e patrullimeve dhe ta katërfishojë praninë në veri të Kosovës”, thuhet në raportin vjetor të NATO-s 2023.
Sipas raportit të së enjtes, tani misioni i KFOR-it i ka 4.700 pjesëtarë në Kosovë, përfshirë edhe forcën rezervë.
Në raportin e tij vjetor, Stoltenberg përmend edhe ndihmën që NATO-ja ia ka ofruar organizatave të sigurisë në Kosovë për ndërtimin e kapaciteteve të tyre, sidomos në fushën e logjistikës, për mbështetje mjekësore, prokurim dhe menaxhim të resurseve njerëzore.
Stoltenberg , gjatë konferencës së tij u bëri thirrje aleatëve të NATO-s që të ofrojnë më shumë municion për Ukrainën, ndërsa shtoi se do të ishte një gabim i madh historik nëse lejohet që presidenti rus Vladimir Putin të fitojë luftën që ka nisur në Ukrainë.
“Aleatët e NATO-s nuk po i japin Ukrainës municion të mjaftueshëm dhe kjo ka pasoja në fushën e betejës çdo ditë. Ne nuk mund t’i lejojmë udhëheqësit autoritarë të kalojnë rrugën duke përdorur forcën. Kjo do të ishte e rrezikshme për të gjithë ne”, ka thënë, sekretari i përgjitshëm i NATO-s, Jens Stoltenberg
Raporti i prezantuar të enjten në Bruksel konsiderohet i fundit i paraqitur nga sekretari i tanishëm Stoltenberg, pasi pritet që së shpejti, mundësisht para samitit në Uashington në korrik, aleatët të pajtohen për emërimin e pasardhësit të Stoltenbergut.
NATO-ja prezanton rregullisht raport vjetor për aktivitetet e veta.
