Për të mos pasur dallime mes punëtorëve të sektorit publik, synimi i Qeverisë ka qenë që të ketë kontrata të përgjithshme kolektive për mësimdhënësit, e jo sektoriale. Kështu bëri të ditur në një intervistë për Tëvë 1, ministrja e Arsimit, Arbërie Nagavci.
Ajo theksoi se kjo kontratë ka synim që të adresohen interesat më të mira të punëtorëve të sektorit publik, pa marrë parasysh profesionet që ata kanë.
“Pra të mos ketë dallime në mes të punëtorëve të sektorit publik, që ta zëmë një i punësuar tjetër në sektorin publik, i cili punon ndoshta tetë orë edhe më shumë në punë, i cili mund të punojë në ndërrimet e natës në kushtet të rrezikshmërisë në punë, të mos ketë benefitet të cilët mund të kenë të punësuar të tjerë të sektorit publik…synimi jonë është që të ketë një kontratë të përgjithshme kolektive në mënyrë që të adresohen interesat më të mira të punëtorëve të sektorit publik, pa marrë parasysh a punojnë ata në arsim, në shëndetësi, në polici apo në sektorët të tjerë”, deklaroi ajo në “Info Nata” në Tëvë 1.
Sipas saj, është me rëndësi që të mos ketë shfrytëzime, teksa potencoi se “së paku dy kontratat e fundit janë nënshkruar në kohë të fushatës elektorale, pa një analizë të nevojshme”.
Më 22 nëntor 2022, Ministria e Arsimit, Shkencës, Teknologjisë dhe Inovacionit (MASHTI) e ka shkëputur Kontratën Kolektive me Sindikatën e Bashkuar e Arsimit, Shkencës dhe Kulturës së Kosovës (SBASHK).
Kontrata Kolektive ishte nënshkruar në janarin e vitit 2021 nga ministri i Arsimit aso kohe, Ramë Likaj, dhe kryetari i SBAShK-ut, Rrahman Jasharaj.
E njëjta i siguronte mbulimin e shpenzimeve të udhëtimit për mësimdhënës, kompensimin e shujtës, shpërblimin jubilar dhe beneficione të tjera për punëtorët e arsimit. /Teve1.info/
