Sot në ditën e mësuesit, ministrja e Arsimit, Arbërie Nagavci ka thënë se mësimdhënia është një mision, teksa kujtoi me nderim të gjithë ata që i falën jetën arsimit shqip ndër vite.
Përmes një videomesazhi, Nagavci theksoi se mision kanë këmbënguljen për punë e përkushtim, përcjell teve1.info
“Mësimdhënia mbi të gjitha është një mision, sidomos në rrethanat në të cilat jemi gjendur ne kur krahas arsimit është bartur brez pas brezi edhe fryma e atdhedashurisë dhe kërkesës së fuqishme për liri e shtet. Prandaj kujtojmë me nderim të gjithë ato mësimdhënëse e mësimdhënës që i falën jetën arsimit shqip ndër vite. Ndërsa sot, misioni ynë mbetet këmbëngulja për punë dhe përkushtim, angazhim të gjithëmbarshëm të mësimdhënësve tanë për të avancuar mësimdhënien dhe për ta bërë atë konkurrente me vendet e zhvilluara”, është shprehur ajo.
Ministrja Nagavci po ashtu potencoi se do të bëjë përpjekje për të bërë më të mirën për fëmijët.
“Si mësimdhënëse dje, dhe si ministre sot, njoh dhe vlerësoj pafundësisht punën tuaj, punën e mësuesit rezistues, reformues e frymëzues. Do të vazhdojë të jem zëri juaj në përpjekjen për të bërë më të mirën për fëmijët tanë. Uroj që të keni gjithmonë vullnetin dhe motivin që fëmijët tanë t’ përgatisim për të ecur të sigurt me bashkëmoshtarët e tyre kudo në botë”, shtoi ajo. /Teve1.info/
