Shefja e Grupit Parlamentar të Vetëvendosjes, Arbërie Nagavci, ka kritikuar Serbinë për mosdorëzimin e Milan Radojiçiqit te autoritetet e Kosovës dhe për deklaratat e zyrtarëve serbë lidhur me territorin e Kosovës. Ajo ka përmendur edhe shfaqjen publike të Radojiçiqit në një tubim të Partisë Progresive Serbe në Kragujevc.
Shefja e Grupit Parlamentar të Lëvizjes Vetëvendosje, Arbërie Nagavci, ka kritikuar Serbinë për qëndrimin ndaj Kosovës, duke vënë në pah rastin e Milan Radojiçiqit, të cilin e cilësoi si organizator të sulmit të armatosur në Banjskë, më 24 shtator 2023.
Nagavci tha se, derisa Kosova vazhdon bashkëpunimin me Bashkimin Evropian, Shtetet e Bashkuara të Amerikës dhe NATO-n për sigurinë rajonale, Serbia, sipas saj, vazhdon të ndërhyjë politikisht dhe të tolerojë persona të lidhur me krimin e organizuar.
Ajo iu referua paraqitjes publike të Radojiçiqit më 9 tetor, në Kragujevc, ku, sipas saj, ai u shfaq pranë djalit të presidentit serb, Aleksandar Vuçiq, gjatë një tubimi të Partisë Progresive Serbe.
“Më 9 tetor, në Kragujevc, kreu terrorist Milan Radojiçiq u shfaq pranë djalit të Aleksandar Vuçiqit në tubimin e Partisë Progresive Serbe. Organizatori i sulmit terrorist të Banjskës, ku u vra heroi ynë, rreshteri Afrim Bunjaku, i sanksionuar ndërkombëtarisht për lidhje me krimin e organizuar dhe korrupsionin, dhe ndaj të cilit është lëshuar fletarrestim ndërkombëtar përmes Interpolit, vazhdon të jetë i lirë në Serbi”, deklaroi Nagavci.
Ajo theksoi se paraqitja e Radojiçiqit në këtë tubim është, sipas saj, tregues i qëndrimit të autoriteteve serbe ndaj tij, në një kohë kur në Serbi po zhvillohen protesta kundër korrupsionit dhe keqqeverisjes.
“Kjo ndodh kur protestat kundër korrupsionit dhe keqqeverisjes kanë tronditur pushtetin e Vuçiqit, ndërsa pranë familjes së tij shfaqet një figurë e sanksionuar për lidhje me rrjetet kriminale dhe me veprimtari terroriste. Radojiçiq e ka pranuar organizimin e grupit që sulmoi Policinë e Kosovës më 24 shtator 2023”, tha ajo.
Nagavci kritikoi gjithashtu Serbinë për mosdorëzimin e Radojiçiqit te drejtësia e Kosovës dhe për moszbatimin e fletarrestimit ndërkombëtar.
“Ndërkohë që Serbia nuk e ka dorëzuar para drejtësisë së Kosovës dhe nuk ka ekzekutuar fletarrestimin ndërkombëtar. Çfarë shteti është ky në mes të Evropës? Shtet i papërgjegjshëm, i padenjë për çdo lloj marrëdhënie ndërkombëtare”, u shpreh Nagavci.
Në deklaratën e saj, Nagavci iu referua edhe deklaratave të ministrit të Brendshëm të Serbisë, Ivica Daçiq, i cili, sipas saj, më 7 tetor, në Rashkë, kishte deklaruar se flamuri serb do të valëvitej mbi Prizren dhe se Kosova mund të ishte e pushtuar, por jo e pavarur.
Ajo i cilësoi këto deklarata si vazhdimësi të pretendimeve territoriale të Beogradit ndaj Kosovës.
“Më 7 tetor, ndërkaq, në Rashkë, Ivica Daçiq deklaroi se flamuri serb do të valvitet mbi Prizren dhe se Kosova mund të jetë e pushtuar, por kurrë e pavarur. Ne nuk habitemi. Këto nuk janë vetëm deklarata elektorale, por vazhdimësi e pretendimeve territoriale nga të cilat Beogradi nuk ka hequr dorë”, deklaroi ajo.
Në fund, Nagavci përmendi edhe nderimet publike për Ratko Mladiqin, ish-komandantin ushtarak serb të dënuar për gjenocid dhe krime lufte, duke i cilësuar ato si dëshmi të trashëgimisë politike që, sipas saj, vazhdon të jetë e pranishme në Serbi.
