Muaji qershor në Kosovë shënohet me një sërë datash përkujtimore të çlirimit të komunave, të cilat organizohen përmes bashkëpunimit ndërmjet institucioneve lokale dhe shoqatave të dala nga lufta.
Për këtë, kandidati për deputet nga PDK-ja, Rrustem Mustafa i njohur si komandant “Remi”, tha se këto aktivitete po zhvillohen në një frymë bashkërendimi mes komunave si Prishtina, Podujeva dhe të tjera.
Ai pret që edhe rezultati i zgjedhjeve të 7 qershorit të ndikojë në forcimin e këtij bashkëpunimi dhe në krijimin e një atmosfere më të mirë institucionale për organizimin e festave përkujtimore.
“Tashmë është bërë një kohë e gjatë që komunat bashkëpunojnë mes veti me shoqata të dalura nga lufta për t’u bërë manifestimi i ditëve të çlirimit. Tashmë jemi në prag të ditëve të çlirimit në komunat si Prishtinë, Podujevë e më gjerë dhe unë po shpresoj që do të jenë ditë të mira dhe të jenë të gjithë të angazhuar që festat të dalin sa më të mira, por këtu do të na ndihmojë edhe rezultati i 7 qershorit, për t’u ndierë të gjithë më mirë”, tha ai në emisionin “Këndi i Debatit” në Tëvë1.
Në këtë kontekst, Mustafa bëri të ditur ekskluzivisht se me rastin e 30-vjetorit të rënies së heroit Zahir Pajaziti, është planifikuar vendosja e shtatores së tij në sheshin e ri të Tiranës, më 31 dhjetor, si një akt nderimi për figurën e tij.
“Sot po e jap edhe një lajm për herë të parë ekskluzivisht këtu në Tëvë -Shtatorja e Zahir Pajazitit do të vendoset në sheshin e ri të Tiranës më 31 dhjetor me rastin e 30-vjetorit të rënies së heroit”, tregoi Mustafa.
