Sulmuesi i Kosovës, Vedat Muriqi ishte vendimtar te skuadra e Mallorcas, e cila regjistroi fitoren e tretë këtë sezon në La Liga
Mallorca, të dielën në shtëpi triumfoi me rezultatin minimal 1:0 kundër Getafes, në ndeshjen e xhiros së 12-të në kampionatin spanjoll.
Muriqi shënoi golin e fitores, pasi realizoi në minutën e 14-të, dhe tani Mallorca është në kuotën e 12 pikëve në tabelë.
Sulmuesi 31-vjeçar ishte startues te Mallorca dhe luajti deri në minutën e 88-të, ndërsa Marash Kumbulla mungoi për shkak se ende nuk është rikuperuar plotësisht nga lëndimi.
Për Muriqin, ky është goli i gjashtë në 11-të ndeshje kampionale dhe ka ardhur në momentin më të mirë të mundshëm, duke pasur parasysh se javën tjetër do të grumbullohet me Kosovën.
Kosova, i luan dy ndeshjet e fundit të ciklit kualifikues për Botërorin 2026, ku fillimisht përballet me Slloveninë në Lubjanë, pëpara se ta presë Zvicrën në Prishtinë.
“Dardanët” të hënën e nisin grumbullimin në Prishtinë.
