Sa i përket faljes së tatimit në pronë, ministri i Financave, Hekuran Murati, thotë se u takon komunave nëse duan ta shfrytëzojnë mundësinë për faljen e 100 eurove, pasi që sipas tij ligji i ndryshuar e mundëson këtë.
Murati thotë se si Qeveria kanë hartuar ligjin e ndryshuar, i cili është miratuar në Kuvend.
“Një mundësi të tillë për të lehtësuar barrën e tatimpaguesve e patën kërkuar pothuajse të gjitha komunat. Tani, u takon komunave të vendosin nëse duan ta shfrytëzojnë këtë mundësi ose jo”, ka shkruar Murati në Facebook.
Tutje, ai ka shkruar se deri në fund të muajit gusht 2023, nga tatimi në pronë kanë mbledhur mbi 35 milionë euro, që sipas tij e tejkalon me rreth 500 mijë euro nivelin e mbledhur për komplet vitin 2022″.
Murati, ka bërë thirrje që përveç Komunës së Graçanicës, Obiliq e Drenasit, edhe komunat tjera të shfrytëzojnë mundësinë e faljes së një pjese të tatimit në pronë.
“Marrë parasysh këtë performancë të mirë, i inkurajoj edhe komunat tjera që të shfrytëzojnë mundësinë e faljes së një pjese të tatimit në pronë që të lehtësojnë barrën e qytetarëve, para datës 15 shtator 2023, kur edhe përfundon afati ligjor”, ka shkruar ai tutje./teve1.info/
