Ministri i Financave, Hekuran Murati ka thënë se kjo ministri nuk është duke i bllokuar të hyrat vetanake të komunave.
“Po manipulohet se çfarë ka ligji i buxheti, MF-ja nuk ka problem me interpretime të buxhetit aty shkruan shumë mirë se të hyrat vetanake komunale nga viti 2022 barten në vitin 2023, opozita LDK-ja në këtë rast po kushtëzon barti edhe të hyrat e viteve paraprake kështu duke shkelur ligjin pasi kjo nuk parashihet në ligj”.
“Këta pikërisht për këtë e kanë bërë një amendament kur ka qenë votimi në lexim të dytë i ligjit të buxhetit dhe patën thënë që e kanë rregulluar këtë çështje tash po del që s’është ashtu. Unë kërkoj që LDK-ja nëse kërkon të zbatohet duhet të ketë amendament të ligjit, Ministria e Financave nuk është duke e blloku procesin”, tha ai në Kuvendin e Kosovës.
Ndërsa, shefja e Grupit Parlamentar të Vetëvendosjes, Mimoza Kusari-Lila, i ka kërkuar Lidhjes Demokratike të Kosovës që të iniciojë kërkesë për plotësim-ndryshimin e t Ligjit për Buxhetin, që të zhbllokohen mjetet vetanake të komunave.
“Prandaj i bëj thirrje në emër të Grupit Parlamentar të Vetëvendosjes, Lidhjes Demokratike të Kosovës që të iniciojë kërkesën që ne do ta mbështesim dhe natyrisht në procedurë të shpejtë të bëjmë plotësim ndryshimin e projektligjit pasi ta sjellë Ministri, në mënyrë që të zhbllokohen mjetet e komunave por edhe që të procedojmë me votimin e marrëveshjeve ndërkombëtare”, ka thënë Kusari-Lila.
Këto deklarime kanë ardhur pas kushtëzimit të LDK-së që t’i zhbllokojnë mjete vetanake të komunave në mënyrë që opozita t’i votojë marrëveshjet ndërkombëtare.
Ndryshe, Qeveria ka vendosur që t’ua marrë komunave mjetet vetanake që u kanë mbetur pa shpenzuar.
Komunën e Prishtinës, ka paralajmëruar se nëse nuk iu rikthehen mjetet e marra nga Qeveria do të dërgojnë ankesë në Gjykatën Kushtetuese.
