Kreu i Lëvizjes për Bashkim, Valon Murati, ka reaguar lidhur me atë që po ndodh në raportin mes Kosovës dhe SHBA-së pas ngjarjeve të fundit në veri të vendit.
Murati ka thënë se ambasadorët apo emisarët diplomatik nuk krijojnë politikë, por ata përçojnë mesazhet dhe qëndrimet zyrtare të shteteve të tyre.
Kreu i LB thotë se deklarimet se ambasadorët apo emisarët kanë qëndrimet të ndryshme nga Uashingtoni zyrtar mund të dërgohen shpesh kohëve të fundit në Prishtinë e Tiranë.
Përmes një statusi në Facebook, Murati ka thënë se njëjtë po ndodh edhe me Gabriel Escobarin.
“Kjo në rastin më të mirë është injorancë e thellë, e në rastin më të keq, sidomos kur vjen nga politikanë, analistë e “ekspertë” është manipulim i pastër me opinionin publik. Nga kjo e fundit mund të fitojnë në planin afatshkurtër politikan të caktuar, po nuk fiton Kosova. Të vërtetën duhet ta shohim drejt në sy dhe të ballafaqohemi me të, e jo t’i iket asaj duke manipuluar me opinionin”, ka shkruar Murati.
