Deputeti i LVV-së, Armend Muja ka kërkuar nga deputetët që të votohet Projektligji për Buxhetin e Kosovës për vitin 2025.
Muja ka thënë se ky buxhet i ka katër orientime kryesore, që sipas tij trajtohen deri në themel.
“Sot po e paraqesim buxhetin e vitit 2025 dhe janë katër orientime kryesore se ku do të kontribuojë ky buxhet. E para është zhvillimi i qëndrueshëm ekonomik, zhvillimi i barabartë njerëzor, siguria dhe sundimi i ligjit dhe në fund qeverisja e mirë. Këto janë katër prioritete që ky buxhet i trajton në themel. Në lidhje me zhvillimin e qëndrueshëm ekonomik do të shpenzohen mbi 500 milionë euro në kategori të ndryshme.
Në kuadër të trajtimit të këtij prioriteti të rëndësishëm përfshihen investime thelbësore në infrastrukturën rrugore, hekurudhore, por edhe përmirësimin e komunikimit me rrjetet pan evropiane të transportit. Autostrada Prishtinë-Mitrovicë, Prishtinë-Podujevë, Prishtinë-Pejë, Prishtinë-Gjilan, lidhja Prizren-Tetovë, por edhe lidhjet Plavë-Deçan-Plavë, dhe Pejë-Rozhajë parashihen të jenë prioritete të rëndësishme në kuadër të investimeve infrastrukturore. Ajo që është po ashtu e rëndësishme, është që buxheti prioritizon energjinë e ripërtritshme dhe investimet për t’i bërë bizneset tona më konkurruese dhe për të përshpejtuar transformimin digjital si formë e rritjes së konkurruesmërisë së industrive të ndryshme në Kosovë”,nënvizoi Muja.
Muja ka thënë se 5 milionë euro janë ndarë për çerdhe të reja si dhe buxheti parasheh 25 milionë euro për ata që kyçen për herë të parë në tregun e punës.
“Janë katër aspekte që trajtohen këtu: përmirësimi dhe zgjerimi i qasjes në arsim. Janë 5 milionë euro që dedikohen për çerdhe të reja. Buxheti parasheh 25 milionë euro për ata që kyçen për herë të parë në tregun e punës. Prioriteti për përmirësim të shëndetësisë, buxheti parasheh buxhet rekord rekord për shëndetësi, tejkalon 370 milionë euro”, tha ai.
Partitë opozitare, LDK, PDK dhe AAK janë deklaruar se nuk do ta votojnë buxhetin e Kosovës.
Por, nga partia në pushtet, Lëvizja Vetëvendosje kanë thënë se e kanë shumicën parlamentare për ta votuar buxhetin e Republikës për vitin e ardhshëm.
