Ministria e Punëve të Jashtme dhe Diasporës e Republikës së Kosovës ka dënuar deklaratën e Serbisë lidhur me memorandumin trepalësh mes Kosovës, Shqipërisë dhe Kroacisë në fushën e mbrojtjes të nënshkruar më 18 mars në Tiranë.
Në reagimin e MPJD-së thuhet se deklarimet nga Serbia përveç që është agresive dhe kërcënuese përbën shkelje të hapur të Marrëveshjeve të Brukselit.
Ministria e Punëve të Jashtme dhe Diasporës e Republikës së Kosovës dënon ashpër deklaratën e fundit të Serbisë në lidhje me memorandumin trepalësh të nënshkruar mes Kosovës, Kroacisë dhe Shqipërisë. Kjo deklaratë nuk është vetëm agresive dhe kërcënuese, por gjithashtu përbën një shkelje të hapur të Marrëveshjeve të Brukselit, të cilat Serbia ka pretenduar se i pranon, por ka refuzuar me qëllim t’i nënshkruajë—duke dëshmuar edhe një herë qëllimet e saj të këqija dhe mungesën e vullnetit për t’u angazhuar në një dialog të mirëfilltë. Duke bërë deklarata të tilla, Serbia minon angazhimet e saj për ndërtimin e marrëdhënieve të mira fqinjësore me Kosovën dhe për njohjen e institucioneve dhe kornizës ligjore të Kosovës si të vetmet autoritete të vlefshme brenda vendit tonë”, thuhet nga MPJD.
Tutje thuhet se Serbia përmes retorikës së mbushur me tone hegjemoniste, përpiqet të paraqitet fuqi dominuese në Ballkanin Perëndimor dhe sjellja e saj është e papranueshme
“Duke kërkuar shpjegime nga Kroacia dhe Shqipëria—dy shtete sovrane, të dyja anëtare të NATO-s, me Kroacinë gjithashtu anëtare e Bashkimit Evropian. Kjo sjellje është tërësisht e papranueshme dhe përbën një tjetër shkelje të Marrëveshjes së Brukselit, e cila parashikon qartë se Serbia nuk do të pengojë marrëdhëniet ndërkombëtare të Kosovës dhe nuk do të pretendojë të flasë në emër të Kosovës në marrëdhëniet me shtete dhe organizata të tjera”, thuhet nga MPJD, raporton teve1.info.
Sipas Ministrisë së Jashtme të Kosovës, Serbia është shteti që ka kontribuuar më së shumti në destabilizimin e Ballkanit Perëndimor.
MPJD e ka cilësuar hipokrizi pretendimet e Serbisë për neutralitet duke përmendur lidhjet me Rusinë dhe Iranin.
“Për më tepër, pretendimi i Serbisë për neutralitet është hipokrizi, duke marrë parasysh marrëdhëniet e saj të thelluara politike dhe ushtarake me regjime autoritare si Rusia dhe Irani—të gjitha shtete që përbëjnë kërcënime serioze për sigurinë rajonale dhe globale. Ndërsa bota demokratike qëndron e bashkuar kundër agresionit, Serbia vazhdon të rreshtohet me vende jodemokratike që punojnë aktivisht kundër stabilitetit në Evropë dhe më gjerë”, thuhet tutje.
