Ministria e Punëve të Jashtme dhe Diasporës e Kosovës ka bërë të ditur se përmes misioneve diplomatike është në komunikim të vazhdueshëm me qytetarët e Republikës së Kosovës që ndodhen në Lindjen e Mesme me qëllim të përcjelljes së gjendjes së tyre dhe ofrimit të mbështetjes së nevojshme.
Sipas të dhënave të fundit të MPJD-së në Izrael ndodhen 21 qytetarë, në Arabinë Saudite 331 qytetarë, në Emiratet e Bashkuara Arabe rreth 400 qytetarë rezident dhe 70 turistë të lajmëruar, në Katar 75 qytetarë, në Kuvajt përafërsisht 60 qytetarë, në Bahrejn 4 qytetarë dhe në Oman 2 qytetarë.
Sipas informacioneve nga misionet diplomatike, të gjithë qytetarët e Kosovws, aktualisht janë në gjendje të mire shëndetësore.
“Ministria e Punëve të Jashtme e Emirateve të Bashkuara Arabe ka njoftuar se kufijtë tokësorë me Omanin mbeten të hapur. Aktualisht, janë të disponueshme edhe disa opsione fluturimi, nga Rijadi drejt Frankfurtit dhe nga Xheda drejt Prishtinës”, thuhet në njoftimin e MPDJ-së.
Ministria njofton se institucionet vendore të gjitha shteteve të rajoni rekomandojnë dhe udhëzojnë që të mos ndërmerren udhëtime deri në qetësimin e plotë të situatës së sigurisë.
“Autoritetet përkatëse kanë bërë të ditur se secili udhëtim i ndërmarrë në rrethana të tilla bëhet me përgjegjësi individuale, pasi shtetet nuk mund të marrin përgjegjësi për pasojat e mundshme që mund të lindin nga zhvillimet e paparashikueshme të situatës”, thuhet nw njoftim.
Rekomandimet që ka dhënë MPDJ për qytetarët janë që të qëndrojnë të qetë dhe të ndjekin me përpikëri udhëzimet e autoriteteve lokale, të shmangin lëvizjet e panevojshme dhe të qëndrojnë në kontakt të rregullt me përfaqësitë tona diplomatike.
Ndërsa MPDJ në njoftimin e tij thotë se për çdo nevojë urgjente qytetarët mund të kontaktojnë në:
Ambasada e Republikës së Kosovës në Emiratet e Bashkuara Arabe: +971 547092109
Ambasada e Republikës së Kosovës në Izrael: +972 586 340450
Ambasada e Republikës së Kosovës në Arabinë Saudite: +966 537508835
Ambasada e Republikës së Kosovës në Katar: +974 5055 9453
