Futbollistët e Sllovenisë kanë vazhduar me stërvitje edhe të mërkurën, në mënyrë që të përgatiten sa më mirë para ndeshjes kualifikuese për Botërorin 2026 kundër Kosovës.
Federata sllovene, ka shkruar se “atmosfera në ekipin kombëtar është e shkëlqyer dhe lojtarët janë plot energji dhe të përqendruar në arritjen e qëllimit të tyre – fitimin e të gjashtë pikëve në dy ndeshjet e ardhshme”.
Vet futbollistët kanë insistuar se pas Kosovës, duan ta mposhtin edhe Suedinë për të siguruar të paktën vendin e dytë në grup që dërgon në play-off.
“Përgatitjet nuk janë të ndryshme nga ato të mëparshmet. Jemi të vetëdijshëm për atë që duhet të bëjmë – të fitojmë gjashtë pikë. Atmosfera është e shkëlqyer, unë dhe djemtë jemi plotësisht të motivuar dhe mezi presim të dyja ndeshjet”, tha mbrojtësi Vanja Drkushiq.
Ai beson se çelësi i suksesit këtë herë do të jetë gjithashtu një mbrojtje e fortë dhe e besueshme. 26-vjeçari bën karrierë në Rusi, te skuadra e Zenitit.
“Gjithçka vjen nga mbrojtja e mirë. Kështu e arritëm rezultatin në Kampionatin Evropian. Duhet të besojmë në atë që po bëjmë dhe golat do të vijnë. Mungesa e Benjaminit është një hendikep i madh, por ky është futbolli – do të duhet të ia dalim pa të. Ky do të jetë një motivim shtesë për ne, sepse do të luajmë edhe për të “, u shpreh Drkushiq.
Mbrojtësi slloven e kujton mirë ndeshjen e parë në Prishtinë, e cila përfundoi pa gola.
“Ne luajtëm një ndeshje shumë cilësore në Kosovë dhe, sipas mendimit tim, e merituam fitoren. Këtë herë po luajmë në shtëpi, para tifozëve tanë, dhe nëse jemi të sinqertë, nuk duhet të shqetësohemi. Megjithatë, sigurisht që kemi një detyrë sfiduese përpara, pasi lojtarët e Kosovës do të vijnë gjithashtu të motivuar”, shtoi Drkushiq.
Edhe Sandi Lovriq është gjithashtu i sigurt dhe mbështetet në ndihmën nga tribunat.
“Kemi dy ndeshje shumë të rëndësishme dhe të vështira përpara nesh. Po përgatitemi mirë, jemi të sigurt dhe duhet të tregojmë cilësinë tonë në fushë. Në Prishtinë vërtetuam se mund të luajmë kundër tyre, por për fat të keq nuk shënuam. Këtë herë do të kemi mbështetjen e tifozëve vendas, të cilët patjetër do të na japin energji shtesë për të fituar”, thotë Lovriq.
