Prokuroria Speciale e Kosovës, në bashkëpunim me Policinë e Kosovës, ka arrestuar sot pesë persona të dyshuar për përfshirje në Masakrën e Reçakut, e kryer më 15 janar 1999.
Megjithëse në dhjetor të vitit të kaluar ishte ngritur një aktakuzë lidhur me këtë rast, hetimet kanë vazhduar edhe më tej. Sipas Prokurorisë Speciale, puna intensive hetimore gjatë gjashtë muajve të fundit ka mundësuar identifikimin e pesë të dyshuarve të tjerë, të cilët janë arrestuar gjatë aksionit të sotëm.
Detaje rreth operacionit ka dhënë prokurori Ilir Morina, i cili tha se ekzistojnë dyshime të bazuara se të arrestuarit kanë qenë pjesëtarë të njësive speciale të policisë serbe dhe kanë marrë pjesë në aksionin e zhvilluar në Reçak.
“Gjatë vazhdimit të hetimeve në muajt e fundit kemi arritur të identifikojmë edhe disa persona që kanë qenë pjesë e njësive të veçanta të policisë së Serbisë në atë kohë dhe që dyshohet se kanë marrë pjesë në aksionin e 15 janarit në Reçak”, deklaroi Morina.
Masakra e Reçakut konsiderohet një nga krimet më të rënda të luftës në Kosovë. Më 15 janar 1999, në këtë fshat u vranë 45 civilë shqiptarë.
