Policia e Kosovës ka nisur grumbullimin e informacioneve lidhur me dyshimet për vjedhje apo keqpërdorim të votave në qytetin e Mitrovicës, pas zgjedhjeve lokale të së dielës.
Lajmin e ka konfirmuar për Tëvë1 zëdhënësi i Prokurorisë Themelore të Mitrovicës, Valon Preteni, i cili tha se policia është duke mbledhur të dhëna në lidhje me këto pretendime.
“Policia është duke grumbulluar informata lidhur me pretendimet për keqpërdorim të votave në këtë lokacion,” deklaroi Preteni.
Sipas rezultateve të publikuara nga Komisioni Qendror i Zgjedhjeve (KQZ), kandidati i PDK-së, Arian Tahiri, ka dalë i pari me një epërsi minimale ndaj kandidatit të Vetëvendosjes, Faton Peci.
Me 100 për qind të votave të numëruara, Tahiri ka marrë 15,368 vota (47.89%), ndërsa Peci 15,340 vota (47.8%), me një diferencë prej vetëm 28 votash.
Kjo do të thotë se të dy kandidatët do të përballen në balotazh, sipas rezultateve preliminare të KQZ-së.
Rezultati në Mitrovicë ka qenë befasues, pasi exit poll-et e publikuara pas mbylljes së qendrave të votimit parashikonin fitore të Tahirit pa nevojë për raund të dytë.
