Sot janë zhvilluar ndeshjet e kthimit gjysmëfinale në kuadër të Kupës së Kosovës në konkurrencën e femrave, ku janë përcaktuar edhe dy skuadrat finaliste të edicionit 2024/25.
Mitrovica dhe Dukagjini janë ekipet që do të përballen në finalen e madhe të kësaj gare. Të dyja skuadrat arritën fitore edhe në ndeshjet e kthimit ndaj kundërshtareve të tyre.
Mitrovica shënoi fitore minimale ndaj Malishevës me rezultat 1:0, falë golit të shënuar nga Emërllahu, derisa në sfidën e parë kishte fituar 2:1. Ndërkohë, Dukagjini konfirmoi epërsinë ndaj Prishtinës, duke triumfuar me rezultat 2:1, pas fitores 2:0 në ndeshjen e parë. Golat për skuadrën nga Klina u shënuan nga Pjetri dhe Berishaj.
Finalja e Kupës së Kosovës në konkurrencën e vajzave do të zhvillohet më 19 maj 2025, në orën 17:00, në stadiumin “Fadil Vokrri” në Prishtinë.
