Mario Mitaj ka insistuar se Shqipëria në ndeshjen kundër Kroacisë do të futet për të marrë pikë.
Në konferencën për shtyp të hënën, Mitaj ka thënë se humbja nga Italia është harruar dhe po shikohet drejt duelit me Kroacinë.
Shqipëria e humbi ndeshjen e parë në Grupin B nga Italia 2:1, ndërsa me Kroacinë do të përballet të mërkurën prej orës 15:00 në qytetin e Hamburgut.
Mitaj pranoi se Shqipëria është edhe më e vendosur për t’i marrë pikë Kroacisë, synim që e pati edhe në duelin me Italinë. Shtoi se për asnjë moment nuk e nënçmojnë Kroacinë, e cila po ashtu e humbi ndeshjen e parë në grup dhe atë me rezultatin 3:0 nga Spanja.
Ai tha se po përgatiten maksimalisht dhe po analizojnë mirë Kroacinë, pasi janë të vendosur të marrin një rezultat pozitiv në këtë përballje.
Pranoi se Kroacia ka cilësi dhe të gjitha repartet i ka të forta, por insistoi se këtë herë do të futet në ndeshje me një mentalitet tjetër prej atij kundër Italisë.
Tha se Italinë e respektuan më shumë se që duhet dhe kjo u kushtoi me humbje minimale, ndonëse shënuan të parët dhe atë me të filluar ndeshja.
Sipas tij, Shqipëria shpresat më të mëdha i ka të sulmuesi Armando Broja, i cili mund ta ndëshkoj Kroacinë kurse shtoi se mbrojtësi i krahut, Elseid Hysaj nuk duhet të kritikohet për paraqitjen e tij ndaj Italisë.
Pas ndeshjes me Kroacinë, Shqipëria do të përballet me Spanjën në duelin e fundit të grupit, i cili luhet më datën 24 qershor.
