Federata e Futbollit të Kosovës ka mbajtur sot kuvendin e jashtëzakonshëm që kishte për rend të ditës miratimin e statutit të ri të kësaj federate.
Në këtë kuvend morën pjesë 54 delegatë dhe pas diskutimeve ku pati mospajtime nga disa prej klubeve, statuti i ri u miratua pasi u votua nga 48 delegatë, ndërsa një delegat abstenoi.
Ndryshimet në statutin e FFK-së u kërkuan nga Komisioni për Vlerësim dhe Licencim brenda Ministrisë së Kulturës dhe Rinisë dhe Sportit në mënyrë që të plotësohet ky kusht, raporton KosovaPress.
Kundërshtimet më të mëdha për statutin e ri erdhën nga drejtori sportiv i Dritës Valon Zymberi dhe presidenti i klubit Trepça ’89 Abedin Zeka të cilët deklaruan para delegatëve se në statutin e ri ka shumë shkelje që mund të jenë pengesë për rilicencimin e Federatës së Futbollit të Kosovës.
Kuvendi u mbajt pa praninë e mediave, ndërsa u transmetua vetëm në kanalet zyrtare të FFK-së në rrjetet sociale.
“Këtë draft statut e kemi pasur të vendosur të bëjmë në kuvendin e radhës, por pas kërkesës së ministrisë e kemi bërë tani. Ka shkuar mirë dhe mirë që ka pasur vërejtje dhe mendime tjera. Të gjitha vërejtjet mund t’i bëjnë më shkrim dhe në kuvendin e ardhshëm të punës t’i aprovojmë dhe t’i bëjmë ndryshimet në përputhje me UEFA dhe FIFA”, ka thënë kryetari i federatës, Agim Ademi.
