Kuvendi i Kosovës ka miratuar edhe dy marrëveshje ndërkombëtare.
Fillimisht u hodh në votim Marrëveshja Kornizë Ushtarake mes Turqisë dhe Kosovës.
Ministri i Bujqësisë, Faton Peci ka treguar se për në cilat fusha bëhet fjalë ky bashkëpunim në mes të dyja vendeve.
Ai ka thënë se marrëveshja përfshin stërvitje dhe edukim ushtarak, industri dhe mbrojtje, shkëmbim të inteligjencës ushtarake, mjekësi ushtarake, operacione paqeruajtëse dhe humanitare kundër terrorizmit.
“Kjo marrëveshje parasheh bashkëpunimin në këto fusha: stërvitje dhe edukim ushtarak, industri dhe mbrojtje, shkëmbim të inteligjencës ushtarake, mjekësi ushtarake, operacione paqeruajtëse dhe humanitare kundër terrorizmit etj. Në mënyrë që kjo marrëveshje të hy në fuqi në përputhje me dispozitat e ligjit për marrëveshje ndërkombëtare kërkojë që të votohet ky projektligj”, u shpreh Peci.
Me 85 vota për, asnjë kundër dhe asnjë abstenim është miratuar ligji për ratifikimin e kësaj marrëveshjeje.
Edhe marrëveshja tjetër, Programi për trajtimin e ujërave të zeza në Komunën e Ferizajt, u miratua në Kuvend.
“80 vota për, asnjë kundër, asnjë abstenim, konstatojë që Kuvendi e miratoi marrëveshjen me Kosovës dhe Bankës Evropiane për këtë marrëveshje”, tha kryetari i Kuvendit, Glauk Konjufca.
Ministri i Shëndetësisë, Arben Vitia tha se kjo marrëveshje kap vlerën e 20 milionë eurove.
“Projekti përfshin dy financues, Bankën Evropiane për rindërtim dhe zhvillim dhe Bashkimin Evropian përmes kornizës së investimeve të Ballkanit Perëndimor. Marrëveshja në Bankën Evropiane për rindërtim dhe zhvillim ka vlerën prej 20 milionë eurove, gjithashtu në kuadër të këtij projekti është dërguar aplikacioni për grant dhe investim”, u shpreh ai. /teve1.info/
