Komisioni Qendror i Zgjedhjeve (KQZ) ka bërë publike raportet financiare të subjekteve politike për fushatën e zgjedhjeve lokale të mbajtura në tetor të vitit 2025, duke nxjerrë në pah dallime të theksuara mes partive sa i përket shpenzimeve dhe të hyrave.
Sipas të dhënave të publikuara nga KQZ, Partia Demokratike e Kosovës (PDK) renditet ndër partitë me shpenzimet më të larta në këtë fushatë, me rreth 273 mijë euro të deklaruara si shpenzime, ndërsa të hyrat e raportuara arrijnë në rreth 249 mijë euro.
Lidhja Demokratike e Kosovës (LDK), nga ana tjetër, ka raportuar se ka shpenzuar mbi 203 mijë euro gjatë fushatës zgjedhore, ndërkohë që të hyrat e saj kanë qenë dukshëm më të ulëta, vetëm rreth 23 mijë e 540 euro.
Ndër partitë kryesore, Aleanca për Ardhmërinë e Kosovës (AAK) ka deklaruar shpenzimet më të vogla. Sipas raportit të dorëzuar, kjo parti ka shpenzuar rreth 24 mijë euro për fushatën, ndërsa të hyrat e raportuara kapin vlerën e afërsisht 86 mijë eurove.
Nga krahasimi i përgjithshëm i shpenzimeve, rezulton se Lëvizja Vetëvendosje ka pasur një buxhet fushate dukshëm më të madh, duke shpenzuar pothuajse sa dyfishi i shumës së shpenzuar nga PDK, LDK dhe AAK së bashku.
Sipas të dhënave zyrtare, Lëvizja Vetëvendosje, e udhëhequr nga kryeministri Albin Kurti, ka deklaruar të hyra në vlerë prej 604 mijë e 131 eurove për periudhën qershor–nëntor 2025.
Në të njëjtën kohë, kjo parti ka raportuar shpenzime që kapin shumën prej 992 mijë e 562 euro, çka nënkupton një mospërputhje financiare prej rreth 400 mijë eurosh mes të hyrave dhe shpenzimeve.
Pjesa më e madhe e buxhetit të shpenzuar është orientuar në aktivitete promovuese. Nga shuma totale, mbi 802 mijë euro janë përdorur për reklama, organizim konferencash dhe shpenzime reprezentative.
KQZ ka bërë të ditur se raportet financiare do t’i nënshtrohen verifikimit dhe auditimit, në përputhje me legjislacionin në fuqi për financimin e subjekteve politike. /teve1.info/
