Ministrja e Drejtësisë, Albulena Haxhiu, ka nënshkruar një marrëveshje me Qeverinë e Shqipërisë.
Lajmin e ka bërë të ditur MD përmes një njoftimi në Facebook.
Marrëveshja ka të bëjë me ‘njohjen e së drejtës së ushtrimit të profesioneve të avokatit dhe ndërmjetësit në zgjidhjen e mosmarrëveshjeve’
Ndryshe Qeveria e Shqipërisë ka nënshkruar 13 marrëveshjet të cilat ishin të planifikuara të nënshkruhen në mbledhjen e përbashkët me Qeverinë e Kosovës e planifikuar të mbahej më 14 qershor në Gjakovë, por që nuk ishte mbajtur për arsye të anulimit nga ana e Ramës.
Lajmin për nënshkrimin e këtyre marrëveshjeve e ka bërë të ditur kryeministri Rama përmes një postimi në Twitter ku ka thënë se marrëveshjet e nënshkruara i janë duruar ministrisë së Jashtme të Kosovës.
“Sot të mëngjes janë dorëzuar në ministrinë e jashtme në Kosovë të 13 marrëveshjet e mbledhjes së dy qeverive të firmosura nga ana jonë. Me kundërfirmosjen e palës kosovare ato hyjnë menjëherë në fuqi”, ka shkruar Rama.
Ai ka thënë se mbetët me shpresë se pas “heqjes së merakut të Kurtit për këto marrëveshje”, do të ndodhë edhe takimi me të pasdite.
“Mbetem me shpresë se pas heqjes së merakut të shprehur publikisht nga KM Kurti për qytetarët e penguar të përfitojnë nga 13 marrëveshjet, do të kemi edhe konfirmimin e takimit me Albinin sot pasdite”, ka shkruar ai.
Kryeministri i Kosovës, Albin Kurti të mërkurën ka thënë se me Ramën dëshiron të takohet në mbledhjen e përbashkët të dy qeverive, dhe se takimet tjera nuk i sheh të arsyeshme.
Në Kosovë ai do të takohet me presidenten Vjosa Osmani dhe kryetarin e Kuvendit Glauk Konjufca
Rama ka nisur vizita në vendet e Ballkanit Perëndimor për arsye siç ka thënë ai të përgatitjeve për Procesin e Berlinit.
