Bundetagu gjerman ka diskutuar sot për çështjen e anëtarësimit të Kosovës në KiE.
Ministrja e Jashtme e Gjermanisë, Annalena Baerbock, gjatë fjalimit të saj para deputetëve gjermanë tha se Kosova i takon Këshillit të Evropës.
“Kosova si vendi më i ri në demokracinë evropiane, i takon Këshillit të Evropës. Mirënjohës për punën intensive të deputetëve gjermanë. U bëj thirrje të gjithë të përfshirëve dhe Kosovës të bëjnë gjithçka që është në fuqinë e tyre për të arritur shumicën e nevojshme për anëtarësim sa më shpejt të jetë e mundur”, tha Baerbock.
Ndërkohë, krah Kosovës doli edhe deputeti konservator nga radhët e CDU-së, Knut Abraham.
Abraham tha se Kosova duhet të anëtarësohet në KiE, derisa i bëri thirrje qeverisë gjermane që të marrë një vendim përfundimtar në favor të Kosovës.
“Në debatin për 75-vjetorin e Këshillit të Evropës në Bundestag sot, inkurajova qeverinë gjermane që të marrë një vendim përfundimtar për pranimin e Kosovës pasi të gjitha kushtet janë përmbushur”, u shpreh Abraham.
Ndërkaq, ministrja e Jashtme, Donika Gërvalla, ka dërguar një letër presidentit të Asamblesë Parlamentare të Këshillit të Evropës, Theodoros Rousopoulos, duke thënë se Qeveria e Kosovës është duke përgatitur një draft-statut për Asociacionin, të cilin është zotuar t’a dërgojë në Gjykatën Kushtetuese deri në fund të muajit maj.
Franca dhe Gjermania i kanë kërkuar Kosovës të bëjë hapa konkretë për Asociacionin që t’i garantohet anëtarësimi në Këshill të Evropës.
