Ministria e Mbrojtjes ka zhvilluar të enjten një takim bilateral me delegacionin e Forcave të Armatosura të Italisë, në kuadër të planifikimit vjetor të bashkëpunimit në fushën e mbrojtjes.
Takimi rezultoi me finalizimin dhe nënshkrimin e Planit Bilateral Vjetor për vitin 2026, një dokument kyç që përcakton aktivitetet dhe prioritetet e përbashkëta të bashkëpunimit për vitin e ardhshëm.
Plani është nënshkruar nga kolonel Ahmet Ajeti, drejtor i Departamentit për Bashkëpunim Ndërkombëtar dhe Integrime Euro-Atlantike, dhe kapiteni i marinës italiane, Manuel Verdini, përfaqësues i Shtabit të Përgjithshëm të Forcave të Armatosura Italiane.
Gjatë vizitës në Ministrinë e Mbrojtjes, delegacioni italian ka zhvilluar edhe një takim kortezie me drejtorin e Politikave të Mbrojtjes, Faruk Geci. Në këtë takim u diskutua progresi i bashkëpunimit aktual mes dy vendeve si dhe objektivat strategjike për periudhën e ardhshme.
Të dy palët riafirmuan gatishmërinë për të zgjeruar bashkëpunimin, me theks të veçantë në zhvillimin e kapaciteteve ushtarake, shkëmbimin profesional të personelit dhe rritjen e ndërveprimit ndërinstitucional.
“Ministria e Mbrojtjes dhe Republika e Kosovës vlerësojnë lart rolin dhe mbështetjen e Italisë në forcimin e institucioneve tona të mbrojtjes dhe në avancimin e standardeve të sigurisë”, thuhet në njoftim.
