Kontrollet ndaj mjeteve të rënda për respektimin e kufizimeve të peshës po vazhdojnë në të gjithë vendin, me qëllim të mbrojtjes së infrastrukturës rrugore dhe rritjes së sigurisë në komunikacion.
Gjatë periudhës 14–21 gusht 2026, ekipet e Ministrisë së Infrastrukturës, në bashkëpunim me Policinë e Kosovës, kanë kontrolluar peshën e gjithsej 103 mjeteve të rënda.
Nga kontrollet e realizuara, në 30 raste janë evidentuar tejkalime të peshës së lejuar. Prej tyre, 11 raste kanë të bëjnë me persona fizikë, ndërsa 19 raste me persona juridikë. Për këto shkelje janë shqiptuar gjoba në vlerë të përgjithshme prej 14,910 euro.
Ministria e Infrastrukturës ka bërë të ditur se kontrollet do të vazhdojnë pa ndërprerje, pasi tejkalimi i peshës së lejuar dëmton rrugët, rrezikon sigurinë e pjesëmarrësve në komunikacion dhe krijon kosto shtesë për mirëmbajtjen e infrastrukturës publike.
“U bëjmë thirrje pronarëve të mjeteve dhe kompanive transportuese që t’i respektojnë kufizimet ligjore. Mbrojtja e investimeve publike dhe siguria në rrugë janë përgjegjësi e përbashkët”, thuhet në njoftimin e Ministrisë./teve1.info/
