Ministri serb për Integrimin Evropian, Nemanja Staroviq, ka deklaruar se Serbia nuk përballet me ngrirje apo bllokim të fondeve nga Bashkimi Evropian, por vetëm me një proces të rregullt vlerësimi të reformave. Kjo, pavarësisht se vet komisionerja e Marta Kos, njoftoi për bllokimin e fondeve për Planin e rritjes.
Në një intervistë për RTS, ai tha se interpretimet për pezullim fondesh janë rezultat i “informacionit të paplotë”, duke theksuar se Komisioni Evropian ka qenë i qartë se bëhet fjalë për monitorim të vazhdueshëm të përmbushjes së kritereve.
“Komisioni Evropian është shumë i qartë se nuk ka asnjë çështje ngrirjeje ose bllokimi të burimeve financiare”, u shpreh Staroviq.
Megjithatë, një deklaratë e mëhershme nga Komisionerja për Zgjerim, Marta Kos, paraqet një qëndrim ndryshe. Ajo ka theksuar se BE-ja ka pezulluar përkohësisht pagesat nga Plani i Rritjes për Serbinë për shkak të pengesave në fushën e gjyqësorit.
“Për momentin, ne kemi pezulluar të gjitha pagesat nga Plani i Rritjes”, deklaroi Kos.
Plani i Rritjes i Bashkimi Evropian për Ballkanin Perëndimor parashikon rreth gjashtë miliardë euro për periudhën 2024–2027, të kushtëzuara nga progresi në reforma, veçanërisht në sundimin e ligjit dhe luftën kundër korrupsionit.
Pavarësisht kësaj, Staroviq këmbëngul se Serbia mbetet përfituese kryesore në rajon dhe se procesi i integrimit vazhdon. Ai shtoi gjithashtu se, sipas të dhënave të ministrisë, mbështetja për anëtarësimin në BE mbetet shumicë relative në mesin e qytetarëve serbë, edhe pse ka shënuar rënie krahasuar me vitet e mëparshme.
