Tifozët e Milanit morën tjetër goditje të rëndë. Ata të hënën kuptuan se mesfushori Sandro Tonali u shit te Newcastle Unitedi, ndërsa ende po vuanin nga shkarkimi i papritur i ikonës së klubit, Paolo Maldini.
Tonali ishte më shumë se thjesht një lojtar kyç për Milanin. Ishte tifoz i klubit dhe konsiderohej si një kapiten i mundshëm i ardhshëm. Ishte lidhja midis fushës dhe tribunës në stadiumin “San Siro”.
Tonali kishte thënë vazhdimisht në të kaluarën se donte të bëhej ai që italianët e quajnë “bandiera”, një simbol i klubit sikurse Maldini dhe Franco Baresi.
“Dua të qëndroj këtu për aq kohë sa të mundem. Nëse më pyesni sot, do të thosha për pjesën tjetër të karrierës sime. Por është shumë herët për të bërë këto lloj premtimesh, dëshira nuk është e vetmja gjë që ka rëndësi në jetën tonë si futbollistë, ka shumë faktorë të tjerë”, ishin fjalët e Tonalit muaj më parë.
23-vjeçari pranoi ulje rroge para dy vjetësh për të qëndruar te Milani, pas edicionit të tij të parë, tejet zhgënjyes, i huazuar nga Brescia. Doli të ishte një vendim i mirë si për të ashtu edhe për Milanin. Ai ishte vendimtar te Milani në kampanjën drejt titullit të parë në Serie A në më shumë se një dekadë (2022). Ndihmoi ekipin që të rikthehej fuqishëm në Evropë, duke arritur në gjysmëfinale të Ligës së Kampionëve në edicionin e fundit. Eliminimi në gjysmëfinale nga Interi nuk solli zhgënjim por disponim dhe optimizëm. Ekipi i famshëm udhëhiqej nga sulmuesi i krahut, Rafael Leao që rinovoi kontratën deri në vitin 2028. Por më pas drejtori teknik Maldini dhe partneri i tij sportiv Frederic Massara, dyshja që ndërtuan ekipin fitues të titullit, u shkarkuan nga Milani, duke shkaktuar zemërim te tifozët dhe hutim mes lojtarëve.
Largimi i Tonalit është një tjetër “pilulë e hidhur për t’u gëlltitur” nga tifozët pasi yjet Gianluigi Donnarumma dhe Franck Kessie u larguan si lojtarë të lirë në vitet e kalura. Tonali u prezantua të hënën te Newcastle, ekip me të cilin firmosi kontratë të vlefshme deri në verën e vitit 2028. Për kartonin e tij u raportua se Newcastle ka paguar 80 milionë euro.
Kjo është gjithashtu një tjetër shenjë se Milani nuk mund të shtyhet me fuqinë financiare të Premier Leagues si dhe klubet e saj. Serie A fitoi pak më shumë se një miliard euro nga të drejtat televizive edicionin e shkuar, një e dhjeta e asaj që fitoi Premier League.
“Jam i lumtur që kemi siguruar një lojtar si Sandro. Ai është një talent i jashtëzakonshëm, i cili posedon të gjitha cilësitë duke filluar nga mentaliteti e deri te teknika e përsosur. Do të jetë një përforcim shumë i rëndësishëm për ne. Me vetëm 23 vjet, ai tashmë ka përvojë të madhe si një prej lojtarëve më të rëndësishëm në njërën prej top ligave të Evropës. Ka përvojë në Ligën e Kampionëve, ndërsa luan edhe për Italinë”, ka thënë trajneri i Newcastlet, Eddie Howe.
Te Milani tashmë kanë bërë lëvizjen për ta zëvendësuar Tonalin. Javën e shkuar ekipi italian transferoi mesfushorin Ruben Loftus-Cheek nga Chelsea, duke shpresuar se do të jetë në gjendje ta mbulojë boshllëkun.
