Mesfushori i Kombëtares së Kosovës, Leon Avdullahu tashmë ka rënë në syrin e skuadrave të mëdha të Evropës, të cilat veçse kanë filluar monitorimin e tij.
Bëhet e ditur se Milani dhe Tottenhami, janë skuadrat që po insistojnë për Avdullahun, i cili është pjesë e Hoffenheimit që bën gara në Bundesligën gjermane.
Madje, thuhet se Milani kishte bërë ofertë për Avdullahun muajin e shkuar por që është refuzuar nga Hoffenheimi kurse Tottenhami po e sheh si blerje të përkryer për sezonin e ri.
Duke parë interesimin e këtyre skuadrave, Hoffenheimi tashmë ka caktuar çmimin për Avdullahun edhe pse mesfushorin e konsideron si lojtarë të rëndësishëm të ekipit.
Për kartonin e tij, thuhet se Hoffenheimi po kërkon të paktën 40 milionë euro duke pasur parasysh se Avdullahu ka kontratë me ekipin gjerman deri në verën e vitit 2029.
21-vjeçari në verën e vitit të shkuar u transferua te Hoffenheimi nga Baseli për 8 milionë euro dhe po shkëlqen në sezonin e tij të parë në Gjermani.
Deri më tani, Avdullahu ka regjistruar 22 paraqitje për Hoffenheimin dhe ka bërë 1 asistim, ndërsa ka edhe 5 ndeshje të luajtura me Kombëtaren e Kosovës.
