Këshilltari i Sigurisë Kombëtare i SHBA-së, Mike Waltz ka marrë përgjegjësinë e plotë për shtimin padashje të një gazetari, në një bisedë grupore mes përfaqësuesish të rangut të lartë ku planifikoheshin sulme ushtarake në Jemen.
“Unë marr përgjegjësinë e plotë. Kam ndërtuar grupin,” tha Waltz për Fox News të martën, duke shtuar se ishte “e turpshme”.
Presidenti Trump dhe shefat e inteligjencës kanë thënë se nuk ka pas rreziqe sigurie pasi që asnjë informacion i klasifikuar nuk është ndarë në grup.
Por, kryeredaktori i The Atlantic që raportoi se u shtua aksidentalisht në grupin në Signal, ka thënë se ka parë plane të klasifikuara ushtarake për sulmet e SHBA-së ndaj Jemenit, përfshirë edhe paketat e armëve, objektivat dhe kohën, dy orë para se të goditeshin bombat.
Por, ai pohoi se informacionet e tilla nuk i ndau me publikun qëllimisht, për shkak të rrezikut që një rrjedhje e tillë e informacioneve do të kishte për SHBA-në, sidomos në Lindjen e Mesme.
Waltz nuk ishte në gjendje të shpjegonte në intervistën e tij në Fox News se si Goldberg erdhi në bisedë, por ai tha se një anëtar i stafit të tij nuk ishte përgjegjës dhe një tjetër kontakt i tij, pa emër, supozohej të ishte atje në vendin e Goldberg.
“Unë mund t’ju them 100% që nuk e njoh këtë djalë,” tha Waltz, duke shtuar se ai kishte folur me Elon Musk për ndihmë për të zbuluar se çfarë ndodhi.
Por, demokratët dhe disa republikanë kanë bërë thirrje për një hetim duke e përshkruar rrjedhjen si një shkelje të madhe.
Trump e ka quajtur atë një “gabim” pa ndonjë ndikim operacional, kurse drejtori i Inteligjencës Kombëtare, Tulsi Gabbard dhe drejtori i CIA-së, John Ratcliffe kanë mohuar para senatit se ndonjë informacion i klasifikuar është ndarë në grupin në Signal.
Por, disa ekspertë të sigurisë kombëtare kanë argumentuar se rrjedhja ishte një gabim i madh operacional dhe ekspertët e arkivave paralajmëruan se ajo shkelte ligjet për mbajtjen e të dhënave presidenciale.
BBC ka raportuar se, Mbikëqyrja Amerikane, grup mbikëqyrës jopartiak, ka paditur zyrtarët që morën pjesë në bisedë për shkelje të supozuara të Aktit Federal të Regjistrimeve dhe Aktit të Procedurës Administrative.
Grupi tha se duke vendosur bisedën për të fshirë automatikisht mesazhet, grupi shkeli një ligj që kërkonte që zyrtarët e Shtëpisë së Bardhë të dorëzonin të dhënat e tyre në Arkivin Kombëtar.
